هەڵەیەک روویدا! دووبارە هەوڵبدە
عەلی فالح زەیدی، سەرۆکوەزیرانی راسپێردراوی عێراق
رووداو دیجیتاڵ
بە پەڕینەوە لەسەر "پردی ئەمریکی" دەگەیتە قەزای شەترە لە پارێزگای زیقار؛ زێدی رەسەنی عەلی فالح زەیدی، سەرۆکوەزیرانی راسپێردراوی عێراق. لەنێو هۆزی زەیدی و بازاڕەکانی شارەکەدا، دەنگەکان لەنێوان خۆشحاڵی، داواکاریی خزمەتگوزاری و بێئومێدی لە سیستمی سیاسی دابەش بوون.
حەسەن زەیدی، ئامۆزای سەرۆکوەزیرانی راسپێردراو، بە شانازییەوە باسی ئامۆزاکەی دەکات و دەڵێت، "ئەو شایەنی ئەو پۆستەیە، چونکە گەنجێکی خاوەن ئاواتە و چەندین بڕوانامەی جیاوازی هەیە؛ جگە لەوەی بازرگانێکی سەرکەوتووە." حەسەن تەنیا یەک داواکاریی لە ئامۆزاکەی هەیە: "هیوادارین یەکسانی بەرپا بکات و جیاوازی لەنێوان کەسدا نەکات؛ جیاوازی لەنێوان من کە ئامۆزایم لەگەڵ کەسێکی دیکەدا نەکات."
هەڵکەوت عەزیز، پەیامنێری رووداو لە نێو بازاڕی شەترەوە دەڵێت: "رەنگە هیچ کەسێک هێندەی خەڵکی ئێرە بە راسپاردنی عەلی زەیدی خۆشحاڵ نەبن. وەک خۆیان دەڵێن ئەو 'کوڕی ناوچەکەی خۆمانە' و چاویان لەوەیە ئاوڕێکی جددییان لێ بداتەوە."
عەلی، دانیشتوویەکی قەزاکەیە و دەڵێت، "ئەو کوڕی ماممە و هیوادارم سەرکەوتوو بێت." ساجد ئەحمەدیش شۆفێری تاکسییە، هیوادارە ئەم هەنگاوە ببێتە مایەی خێر و خزمەتکردنی وڵات و بە تایبەتی قەزای شەترە.
بەڵام داواکارییەکان تەنیا سۆزداری نین؛ دکتۆر کامل، دانیشتووی شەترە، دەڵێت: "ئەگەر دەڵێت کوڕی شەترەم، با بێت سەیری ناوچەکەی خۆی بکات کە خزمەتگوزاری تێیدا سفرە. شەترە وەک پارێزگایەکی گەورە وایە و شایەنی گرنگیپێدانە."
لە بەرانبەر ئەم گەشبینییەدا، بەشێکی دیکەی خەڵک بە گومانەوە سەیری گۆڕانکارییەکان دەکەن و لە دەسەڵاتە یەک لەدوای یەکەکانی دوای 2003 تووڕەن. جەعفەر کە دووکاندارە، دەڵێت: "من بۆچوونم جیاوازە؛ سەرۆکوەزیرانێکمان دەوێت خزمەتی ئابووری و تەندروستی بکات. 23 ساڵە نە ئابووریمان هەیە، نە تەندروستی و نە پیشەسازی."
عەلی حەسەن، کە کاسبکارە، بێئومێدیی خۆی ناشارێتەوە و دەڵێت: "هەموویان وەک یەکن. ئێستا هەموو شتێک بەدەست چوارچێوەی هاوئاهەنگییە؛ بە کەیفی خۆیان کەسەکان دادەنێن و لادەدەن، بۆیە پێشبینی گۆڕانکاری ناکەم."
عەلی فالح زەیدی کە بە فەرمی راسپێردراوە، 30 رۆژی لەبەردەمدایە بۆ پێکهێنانی کابینەکەی. ئەگەر لەم ئەرکەیدا سەرکەوتوو بێت، دەبێتە 8ـەمین سەرۆکوەزیرانی عێراق لە دوای ساڵی 2003ـەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ