هەڵەیەک روویدا! دووبارە هەوڵبدە
رووداو دیجیتاڵ
سەرپەرشتیاری پڕۆژەکانی رێگاوبانی هەولێر رایگەیاند، 35٪ـی کارەکانی دووسایدی هەولێر - کۆیە تەواو بووە. راشیگەیاند: "درێژییەکەی لە 37 کیلۆمەترەوە بۆ 45 کیلۆمەتر زیاد کراوە".
رۆژی یەکشەممە، 30ـی تشرینی دووەمی 2025، ئەندازیار هەڵگورد وەلید، سەرپەرشتیاری پڕۆژەکانی رێگاوبانی هەولێر بە تۆڕی میدیایی رووداوی راگەیاند: "کارکردن لە پڕۆژەی دووسایدی هەولێر - کۆیە چڕ کراوەتەوە، دەستمان بە قیڕکردن کردووە، 3 کیلۆمەتری سەرەتا قیر کراوە و بەردەوامیشە".
درێژیی رێگەکە 37 کیلۆمەتر بوو. ئەندازیار هەڵگورد وەلید، گوتی: "8 کیلۆمەتریان بۆ رێگەکە زیاد کردووە و ئێستا بووەتە 45 کیلۆمەتر و تاوەکو بازگەی تۆپزاوا لە کۆیە دەچێت".
ماوەی تەواوبوونی پڕۆژەکە سێ ساڵە. سەرپەرشتیاری پڕۆژەکانی رێگاوبانی هەولێر گوتی: "کارەکان زۆر بە باشی بەڕێوە دەچن و پێشبینی دەکەین پێش وادەی دیاریکراو دووسایدی کۆیە - هەولێر تەواو بکرێت".
گوژمەی پڕۆژەکە زیاتر لە 600 ملیار دینارە. سەرپەرشتیاری پڕۆژەکانی رێگاوبانی هەولێر باسی لەوەش کرد: "کارکردن لە هەموو بڕگەکانی بڕین، پڕکردنەوە و قیرکردنیش زۆر بە چڕی بەردەوامە".
ئومێد خۆشناو، پارێزگاری هەولێر ئەمڕۆ یەکشەممە، لە راگەیێندراوێکدا بڵاوی کردەوە: "قیڕکردنی رێگەی دووسایدی هەولێر - کۆیە بەچڕی بەردەوامە، ئەو رێگەیە بە شادەماری رێگاکانی کوردستان دادەندرێت، پڕۆژەیەکی ستراتیژیی رێگاوبانی کوردستانە و بەشێکە لە تۆڕی شادەماری رێگاوبانی کوردستان و پایتەختی هەرێمی کوردستان دەبەستێتەوە بە پارێزگاکانی سلێمانی و هەڵەبجە و ئیدارە سەربەخۆکان، لە هەولێریشەوە بەرەو پارێزگای دهۆک".
سەرجەم ئەو کۆمپانیایانەی کار لە رێگەی هەولێر و کۆیەدا دەکەن، ژمارەی کارمەند و کرێکارەکانیان دەگاتە 1500 کەس.
رۆژی 10-10-2024، مەسرور بارزانی، سەرۆکوەزیرانی هەرێمی کوردستان، بەردی بناخەی پڕۆژەکەی دانا و رایگەیاند: "شۆڕشی ئاوەدانی و خزمەتگوزاری دەگەیێنینە هەموو ناوچەکان بەبێ جیاوازی".
پڕۆژەی رێگەی دووسایدی هەولێر - کۆیە ساڵی 2011 بە گوژمەی 461 ملیار دینار دەست بە جێبەجێکردنی کرا، بەڵام تەنیا 100 ملیار دیناری بۆ خەرج کرا و دواتر راگیرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ