رووداو دیجیتاڵ
ئامانجکردنی نەخۆشخانەیەک لە کەرتی غەززە و کوژرانی سەتان کەس، کاردانەوەی نێودەوڵەتی بەدوای خۆیدا هێنا.
تەندروستیی غەززە ئەمڕۆ سێشەممە، 17-10-2023 بڵاویکردەوە، لە ئەنجامی بۆردوومانکردنی نەخۆشخانەی ئەهلی عەرەب (مەعمەدانی) لە کەرتی غەززە لە لایەن سوپای ئیسرائیلەوە لانیکەم 500 کەس گیانیان لەدەستدا.
بەڵام هێزی بەرگریی ئیسرائیل دەڵێت، ئەو هەموو خەڵکە لە ئەنجامی مووشەکێکی گرووپی جیهادی ئیسلامی کوژراون.
دانیاڵ هەگاری، گوتەبێژی سوپای ئیسرائیلیش دەڵێت، "وردەکاری وەردەگرین و زانیاری دەدەینە خەڵک. ناتوانم بڵێم کە ئایا ئەوەی روویداوە لە ئەنجامی هێرشی ئاسمانیی ئیسرائیل بووە یان نا."
میسر سەرکۆنەی هێرشەکەی کرد و گوتی، پێویستە کۆمەڵگەی نێودەوڵەتی دەستبەجێ دەستوەردان بکات بە مەبەستی کۆتاییهێنان بەو پێشێلکارییانەی دەکرێن.
جەستن ترودۆ، سەرۆکوەزیرانی کەنەدا گوتی، هێرشی سەر ئەو نەخۆشخانەیە "تۆقێنەرە و بە هیچ شێوەیەک قبووڵکراو نییە".
سەرۆکوەزیرانی کەنەدا ئاماژەی بەوەشکرد، "قبووڵکراو نییە نەخۆشخانەیەک بکرێتە ئامانج".
رەجەب تەیب ئەردۆغان، سەرۆککۆماری تورکیا گوتی، هێرشی سەر نەخۆشخانەکە "دوایین نموونەی هێرشەکانی ئیسرائیلە کە لە هەموو بەهایەکی مرۆڤایەتی داماڵراوە".
ئەردۆغان لە تۆڕی کۆمەڵایەتیی ئێکس گوتی، "داوا لە مرۆڤایەتی دەکەم هەنگاو بنێت بە مەبەستی وەستاندنی ئەم دڕاندایەتییە بێ وێنەیەی لە غەززە هەیە".
وەزیری دەرەوەی قەتەریش لە راگەیێندراوێکدا سەرکۆنەی هێرشەکەی کرد و گوتی، "زیادبوونی هێرشەکانی ئیسرائیل بۆسەر کەرتی غەززە، لەوانەش بە ئامانجکردنی نەخۆشخانە، قوتابخانە و ناوەندەکانی دیکە کە خەڵک تێیاندا دەمێننەوە، هەڵکشانێکی مەترسیدارە".
دوای هێرشەکەش، مەحموود عەباس، سەرۆکی دەسەڵاتدی فەلەستینی سێ رۆژ ماتەمینی راگەیاند و بەگوێرەی بەرپرسانی فەلەستین، کۆبوونەوەیەکی لەگەڵ جۆ بایدنی سەرۆکی ئەمریکا لە عەمانی پایتەختی ئوردن هەڵوەشاندووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ