رووداو دیجیتاڵ
سەرۆککۆماری ئێران لە پەیامێکی توونددا بەشێک لە خۆپێشاندەران بە "تیرۆریستی راهێنراو" ناودەبات و هۆشداری دەداتە خێزانەکان رێگە نەدەن گەنجەکانیان ببنە بەشێک لەو "ئاژاوەگێڕییە"ی کە دوژمنانی دەرەکی ئاراستەی دەکەن.
ئەمڕۆ یەکشەممە 11-01-2026، مەسعود پزیشکیان، سەرۆککۆماری ئێران لە هەڤپەیڤینێکدا تیشکی خستە سەر خۆپێشاندان و ناڕەزاییەکانی وڵاتەکەی و رایگەیاند، حکومەت ئامادەیە گوێ لە نیگەرانییەکانی خەڵک بگرێت، بەڵام جیاکاری لەنێوان "خەڵکی ناڕازی" و "ئاژاوەگێڕان" دەکات.
پزیشکیان بە تووندی هێرشی کردە سەر بەشێک لە خۆپێشاندەران و گوتی: "ئەوانەی مزگەوت و بازاڕ دەسووتێنن، هی ئەم وڵاتە نین؛ بەڵکو تیرۆریستن و لە دەرەوە راهێنراون و بە ئامانج زیان بە شوێنە گشتییەکان و موڵکی خەڵک دەگەیێنن."
سەرۆککۆماری ئێران هاوشێوەی بەرپرسانی دیکەی وڵاتەکەی، پەنجەی تۆمەتی بۆ ئەمریکا و ئیسرائیل راکێشا و گوتی: "نابێت خێزانەکان رێگە بدەن گەنجەکانیان ببنە بەشێک لەو ئاژاوەگێڕییەی کە لەلایەن دوژمنانی دەرەکییەوە ئاراستە دەکرێت."
سەبارەت بە داواکاریی کاسبکارانیش، پزیشکیان ئاماژەی بەوە کرد، هەوڵدەدەن کێشەکانیان چارەسەر بکەن و داوای لێکردن بە ئارامی ناڕەزایی دەرببڕن: "ناڕەزایی دەرببڕە. دەبێت گوێ لە ناڕەزاییەکانی تۆ بگرین. پێکەوە دابنیشین و دەست بدەینە دەستی یەکدی و چارەسەری بکەین."
لێدوانەکانی پزیشکیان لەکاتێکدایە دۆناڵد ترەمپ، سەرۆکی ئەمریکا پشتیوانیی خۆی بۆ خۆپێشاندەران دەربڕیوە و هەڕەشەی هێرشی سەربازیی دژی دەسەڵاتدارانی ئێران کردووە، "ئەگەر تەقە لە خۆپێشاندەران بکرێت."
ماوەی دوو هەفتەیە خۆپێشاندانەکان 180 شاری ئێرانی گرتووەتەوە. هەرچەندە سەرەتا ناڕەزاییەکان بۆ گرانی و خراپیی بژێوی بوو، بەڵام ئێستا لە هەندێک شوێن دروشمەکان گۆڕاون بۆ رووخانی دەسەڵات و حکومەتیش زیاتر لە 60 کاژێرە هێڵی ئینتەرنێتی بڕیوە.
بەگوێرەی ئامارە فەرمییەکانی حکومەتی ئێران، 111 ئەندامی هێزە ئەمنیییەکان لە رووبەڕووبوونەوەکاندا کوژراون، هاوکات رێکخراوەکانی مافی مرۆڤ کوژرانی 116 خۆپێشاندەریان پشتڕاست کردووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ