رووداو دیجیتاڵ
بەڕێوەبەرایەتیی خاوەن پێداویستیی تایبەتی پارێزگای ورمێ لە وەڵامی هەواڵی تایبەت بە دەستدرێژیکردنەسەر 3 کچی خاوەن پێداویستیی تایبەت دەڵێت، لە رێگەی پۆلیس و دەزگەی دادەوە لێکۆڵینەوە لەو بابەتە دەکرێ.
کەمپەینی بەدواداچوون بۆ مافی خەڵکی خاوەن پێداویستیی تایبەت رۆژی دووشەممە 09.08.2021 بڵاویکردەوە، یەکێک لە خزمەتگوزارەکانی ناوەندێکی بەخێوکردنی کچانی خاوەن پێداویستیی تایبەتی ورمێ لە کۆتاییەکانی هاوینی ساڵی 2020 دا دەستدرێژی کردووەتەسەر 3 کچی خاوەن پێداویستیی تایبەت.
ئەندامانی کەمپەینە نیگەرانن لەوەی کە داواکاری گشتی و بەڕێوەبەرایەتیی خاوەن پێداویستیی تایبەتی ورمێ بەدواداچوون بۆ دۆسیەکە ناکەن.
سەعید فەریوەر، بەڕێوەبەری گشتیی خاوەن پێداویستیی تایبەتی ورمێ، ئەمڕۆ چوارشەممە 11-08-2021 گوتی: "ئەوەی کە گوایە دەستدرێژی کراوەتەسەر ئەو کچانە جارێ تەنیا تۆمەتە و هەر لە سەرەتای بڵاوبوونەوەی ئەو بابەتەوەش لە تۆڕە کۆمەڵایەتییەکان لە رێگەی پۆلیس و دەزگای دادەوە بە دواداچوون کراوە، بەڵام تاوەکو ئێستا بەڵگەیەکی سەلمێنەر بۆ ئەو بابەتە دەستنەکەوتووە".
بە گوتەی سەعید فەریوەر، بنەماڵەی ئەو کچانە تاوەکو ئێستا سکاڵایان تۆمارنەکردووە.
سەعید فەریوەر دەڵێت: "لێکۆڵینەوە لەو بابەتە دەکرێ و ئەگەر راست بێت، رێکاری یاسایی بەرامبەر ئەنجامدەرانی دەگیرێتەبەر".
لە ئێراندا ئاماری ورد لەبارەی دەستدرێژیکردنەسەر کچانی خاوەن پێداویستیی تایبەت لە بەردەستدا نییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ