لابردنی پەردە لەسەر پەیکەری لەق لەق لە گوندی دەرەتفێ
رووداو دیجیتاڵ
گوندی دەرەتفێ لە مەریوان بە شاری لەق لەقەکان ناسراوە، هەربۆیە پەیکەرێکی لەق لەق دروستکرا و لە رێوڕەسمێکدا پەردە لەسەر پەیکەرەکەی لە گوندەکە لادرا.
ساڵانە لە کۆتایی زستانەوە لەق لەقەکان روو لە دەوروبەری دەریاچەی زرێبار دەکەن. لە دەرەتفێ سەتان هێلانە بۆ مانەوەیان دروستکراوە و خەڵکی گوندەکە پێیانوایە هەر کەس زیانیان پێ بگەیێنێت، تووشی رووداوێکی ناخۆش دەبێت.
ساڵانە بەبۆنەی هاتنی لەق لەقەکان لە گوندی دەرەتفێ فێستیڤاڵی لەق لەق بەڕێوەدەچێت، کە فێستیڤاڵێکی کولتووری و هونەری و ژینگەییە. لە فێستیڤاڵەکەدا ژینگەپارێزانی ناوچە جیاوازەکانی رۆژهەڵاتی کوردستان بەشدار دەبن و لێرەوە کولتووری پاراستنی ژینگە لەلایەن هاونیشتمانییانەوە، لەگەڵ خۆیانەوە دەبەنەوە.
لە فێستیڤاڵی ئەمساڵی لەق لەقدا رێز لە ژمارەیەک بەساڵاچووی گوندی دەرەتفێ گیرا کە رۆڵی بەرچاویان هەبووە لە پاراستنی لەق لەقەکان و پەرەپێدانی کولتووری ژینگەپارێزی لە گوندەکە. هەروەها ژمارەیەک گرووپی هونەری، بە شێوازی جیاواز، کولتوور و هونەری رەسەنی ناوچەکەیان بۆ بەشداربووان خستەڕوو.
لەق لەقەکان ساڵانە نزیکەی شەش مانگ لە دەوروبەری زرێبار دەمێننەوە و لە وەرزی پاییز ناوچەکە جێدەهێڵن. هێشتا لێکۆڵینەوە لەوە نەکراوە، لەق لەقەکان لە مەریوانەوە بەرەو کوێ کۆچ دەکەن، بەڵام یەکێک لە رێڕەوەکانی ئەوان تاڵاوەکانی عێراق، سووریا و ئوردنە و لە کۆتاییشدا تاوەكو کەنارەکانی دەریای مەدیتەرانە دەڕۆن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ