هەڵەیەک روویدا! دووبارە هەوڵبدە
رووداو دیجیتاڵ
لە نەخۆشخانەیەکى دەروونیی بەغدا 160 سپلیت دیار نامێنێنن، بەهۆیەوە بەڕێوەبەرى نەخۆشخانەکە لە پۆستەکەى دوور دەخرێتەوە و لیژنەیەکى لێکۆڵینەوەش لەسەر دیارنەمانى ئەو ئامێرانە پێکدەهێندرێت.
بەگوێرەى نووسراوێکى فەرمیی جاسب لەتیف، بەڕێوەبەرى گشتیى فەرمانگەى تەندروستیى رەسافە لە بەغدا و بە پشتبەستن بە راپۆرتێکی سەردانى مەیدانیی تیمێکى وردبینى فەرمانگەکە، 160 ئامێرى فێنککەرەوە لە نەخۆشخانەى فێرکارى رەشاد بۆ نەخۆشییە دەروونییەکان دیار نەماون.
بەگوێرەى نووسراوەکە، بڕیادراوە بە دەستپێلەکارکێشانەوەى عەلى رشید روکابی، بەڕێوەبەرى نەخۆشخانەکە و لەبرى ئەو بەڕێوەبەرى هۆبەى هونەرى نەخۆشخانەکە، ئەو پۆستە بەڕێوەدەبات.
رۆژی یەکى ئابى 2023، ماجید شنگالى، سەرۆکى لیژنەى تەندروستیی پەرلەمانى عێراق بە تۆڕى میدیایی رووداوى راگەیاند: ئەو 160 سپلیتە تەنیا لەسەر کاغەز هەن و کڕدراون و پارەى بۆ خەرجکراوە بەبێ ئەوەى لەو نەخۆشخانەیە هەبن، ئەمڕۆ لیژنەیەکى لێکۆڵینەوە لە وەزارەتى تەندروستى سەردانى نەخۆشخانەکە دەکات بۆ لێکۆڵینەوە لەو دۆسیەیە.
ماجید شنگالى گوتى: "ئەو نەخۆشخانەیە کێشەی زۆرە، پێشتر لیژنەکان چەند جارێک سەردانیان کردووە، نەخۆشەکانى لە باخچە و راڕەوەکانیدا دەخەون، بەهۆى نەبوونى ئامێرى فێنککەرەوە".
هەر لە بڕیارەکەدا هاتووە، دەبێت هۆبەى پشکنینى ئەو نەخۆشخانەیە دەست بە لێکۆڵینەوە بکات لەسەر دیارنەمانى ئەو فێنککەرەوانە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ