رووداو دیجیتاڵ
سەرۆکی رەوتی حیکمەی نیشتمانی داوایکرد "پەیمانێکی شەرەفی نیشتمانی" لەنێوان لایەنە سیاسییەکاندا بۆ هەڵبژاردنی داهاتووی پەرلەمانی عێراق هەبێت و رایگەیاند: "شەرمەزارییە بازاڕ و بۆرسەی کڕین و فرۆشتنی بەربژێر و دەنگدەران هەبێت."
رۆژی شەممە، عەممار حەکیم، سەرۆکی رەوتی حیکمەی نیشتمانی لە گوتاری نوێژی جەژنی قورباندا، باسی لە هەڵبژاردنی داهاتووی پەرلەمانی عێراق کرد و گوتی: "پێویستمان بە پەیمانێکی شەرەفی نیشتمانییە کە تێیدا سەرجەم هێزە سیاسییەکان بەڵێن بدەن پارەی سیاسی وەک چەکێک لە هەڵبژاردندا بەکارنەهێنن و بەرژەوەندیی باڵای وڵات بخەنە سەرووی هەموو بەرژەوەندییەکی دیکەوە."
چاوەڕوان دەکرێت هەڵبژاردنی پەرلەمانی عێراق لە کۆتایی ئەم ساڵدا بەڕێوەبچێت و هەر لە ئێستاوە باس لە کڕین و فرۆشتنی بەربژێر و دەنگدەران دەکرێت. لەمبارەیەوە عەممار حەکیم گوتی: "شەرمەزارییە بازاڕ و بۆرسە بۆ کڕینی بەربژێر و دەنگدەران هەبێت. ئەمە کارێکی قێزەونە، پارەی حەرامە و خیانەتە لە گەل و نیشتمان."
سەرۆکی رەوتی حیکمەی نیشتمانی راشیگەیاند: "لە کۆتاییهاتنی خولی ئێستای پەرلەمان نزیک دەبینەوە و ئامادەکاری بۆ هەڵبژاردنی نوێ دەستیپێکردووە. ئەمەش نیشانەیەکی دیکەی بووژانەوە و سەقامگیریی سیستمی سیاسییە لە چوارچێوەی ئەزموونی دیموکراسیی عێراقدا کە زیاتر لە دوو دەیەیە بەردەوامە."
عەممار حەکیم جەختیشی کردەوە، ئێستا پێکهێنانی حکومەتەکان لە عێراق لە رێگەی دەنگدانەوەیە و گوتی: "عێراق پێویستیی بە حکومەتێکی دامەزراوەیی هەیە کە خەمی خزمەتگوزاری و گەشەپێدانی ستراتیژی بێت، دوور لە ململانێ و کێبڕکێی تووندی هەڵبژاردن. دەبێت کێبڕکێی هەڵبژاردنەکان لەسەر بنەمای پڕۆگرامی گەشەپێدانی گشتگیر بێت، کە بناخەیەک بۆ پێکهێنانی حکومەتێکی هاوچەرخ و دادپەروەر دابنێت."
سەرۆکی رەوتی حیکمەی نیشتمانیی رایگەیاند، "پێویستە سیستمی هەڵبژاردنمان لەمبارەیەوە یەکلاکەرەوە و تووند بێت، هەرچەندە ئاڵنگارییەکانیش زۆر بن، چونکە ئەمە تاکە رێگەیە بۆ پاراستنی متمانەی دەنگدەر و پابەندبوونی بە سندووقەکانی دەنگدان وەک تاکە رێگەی گۆڕانکاری."
سەرۆکی رەوتی حیکمە پەیامێکی ئاراستەی گەنجان کرد و داوای لێکردن گۆڕەپانەکە بۆ "شکستخواردووان" چۆڵ نەکەن و گوێ لە "دەنگی بێهیوایی" نەگرن. عەممار گوتی: "گرەو لەسەر هۆشیاریی ئێوە دەکرێت، رێگە مەدەن کەس دەست بەسەر دەنگتاندا بگرێت یان ویستە نیشتمانییەکانتان بەلاڕێدا ببات... ئەی گەنجان، بەشداربن، چاودێربن، خۆتان هەڵبژێرن و ببنە خاوەن بڕیار."
عەممار حەکیم ئاماژەی بە رۆڵی نوێی عێراق لە ناوچەکەدا کرد و میوانداریکردنی کۆبوونەوە هەرێمییەکانی بە "لاپەڕەیەکی نوێی بووژانەوە و کرانەوەی هەرێمی و نێودەوڵەتی" ناوبرد، کە "رەنگدانەوەی توانای عێراق بوو لە گێڕانی رۆڵێکی سەرەکی لە نزیککردنەوەی بۆچوونەکان و چەسپاندنی لۆژیکی دیالۆگ لەبری جەنگ."
هەروەها گوتی: "ئەو دەرفەت و خاڵە هاوبەشانەی کە هەن، دەمانخەنە ریزی وڵاتانی پێشکەوتووەوە، بەتایبەت لە بواری ئابووری و گەشەپێداندا. تەنیا پێویستمان بەوەیە سەرنجمان لەسەر وەبەرهێنانی ئەو دەرفەتانە و پشتیوانیکردنی یەکتر بێت بۆ بنیاتنانی گەلەکانمان و ئاوەدانکردنەوەی وڵاتەکانمان."
لە کۆتایی وتارەکەیدا، عەمماری حەکیم ئاماژەی بە قەیرانی کارەبا کرد و گوتی: "ئەمڕۆ بانگەوازەکەم بۆ هەموو لایەنەکان دووبارە دەکەمەوە کە پشتیوانیی حکومەت بکەن بۆ راگەیاندنی دۆخی ئامادەباشیی ستراتیژی، بەمەبەستی چارەسەرکردنی قەیرانی کارەبا بە شێوەیەکی ریشەیی و یەکجارەکی. نابێت ئەم هەوڵە تەنیا لەسەر شانی حکومەتی ئێستا بێت، بەڵکو دەبێت بەردەوام بێت تاوەکو لەم قەیرانە سەخت و درێژخایەنە رزگارمان دەبێت و پێویستە هەموومان لەم پرسەدا هاوکار بین."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ