رووداو دیجیتاڵ
پۆلیسی دیالە دەستگیرکردنەوەی ئەو زیندانییەی راگەیاند، کە دوو رۆژ لەمەوبەر لە زیندانییەکی شاری بەعقوبە رایکردبوو؛ بەهۆی رووداوەکەشەوە سێ ئەفسەر و چوار پۆلیس دەستبەسەر کران.
رۆژی یەکشەممە 08-02-2026 عەمید هەیسەم سەلمان شەمەری، گوتەبێژی پۆلیسی پارێزگای دیالە بە تۆڕی میدیایی رووداوی راگەیاند، "دوای هەوڵێکی چڕ و بەردەوام، شەوی رابردوو لەلایەن هێزە ئەمنییەکانەوە ئەو زیندانییەی لە بەڕێوەبەرایەتیی نەهێشتنی تاوان لە بەعقوبە رایکردبوو، دەستگیر کرایەوە."
زیندانییەکە ناوی (هومام مستەفا عوبەیدی)یە. رەشاد تەمیمی، سەرۆکی لیژنەی ئەمنیی ئەنجوومەنی پارێزگای دیالە لە کۆنگرەیەکی رۆژنامەوانیدا رایگەیاند، ئەو کەسە بە تۆمەتی کوشتنی باوکی دەستگیر کرابوو، بەهۆی ئەوەی تووشبووی نەخۆشیی ئایدز بووە، لە ژووری تاکەکەسیدا زیندانی کرابوو.
رووداوی راکردنەکە ئێوارەی رۆژی هەینی لە زیندانی بەڕێوەبەرایەتیی نەهێشتنی تاوان لەنێو فەرماندەیی پۆلیسی دیالە روویدابوو.
سەبارەت بە لێپرسینەوە لەگەڵ پاسەوانانی زیندانەکە، سەرۆکی لیژنەی ئەمنی گوتی، "لەسەر ئەو رووداوە سێ ئەفسەر و چوار کارمەندی دیکەی پۆلیس کە لە کاتی رووداوەکەدا لە ئەرکدا بوون، دەستبەسەر کراون و لێکۆڵینەوەیان لەگەڵدا دەکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ