رووداو دیجیتاڵ
سەرۆکی ئەنجوومەنی باڵای ئیسلامیی عێراق دەڵێت، یەکلانەکردنەوەی پۆستی سەرۆککۆمار لەلایەن کوردەوە هۆکاری سەرەکیی دواکەوتنی راسپاردنی بەربژێری سەرۆکوەزیرانە. گوتەبێژی ئەنجوومەنەکەش رایگەیاند، ئەگەر پارتی و یەکێتی رێکنەکەون، پەرلەمانتارانی چوارچێوەی هاوئاهەنگی سەرپشک دەکرێن دەنگ بە کام بەربژێر دەدەن.
رۆژی یەکشەممە، 8-02-2026، نووسینگەی هومام حەموودی، سەرۆکی ئەنجوومەنی باڵای ئیسلامیی عێراق بڵاویکردەوە، لە کاتی بەشداریکردنی لە کۆڕبەندێکی دیالۆگدا، حەموودی رایگەیاندووە: "کورد هاوبەشی ئێمەیە و خاوەن پڕۆژەیە، بەڵام یەکلانەکردنەوەی بەربژێری سەرۆککۆمار لەلایەن ئەوانەوە بووەتە هۆی دواکەوتنی راسپاردنی بەربژێری سەرۆکوەزیران."
سەرۆکی ئەنجوومەنی باڵای ئیسلامی پەیامێک ئاراستەی لایەنە کوردستانییەکان دەکات و دەڵێت: "هیوادارین مامەڵە لەگەڵ دەستپێشخەرییەکەی چوارچێوەی هاوئاهەنگی بکەن، کات بەفیڕۆ مەدەن و بە زوویی پرسەکە یەکلایی بکەنەوە."
عەلی دیفاعی، گوتەبێژی ئەنجوومەنی باڵای ئیسلامیی عێراق بە تۆڕی میدیایی رووداوی راگەیاند، هیوادارن یەکێتی و پارتی بگەنە سازان، بەڵام "ئەگەر رێکنەکەوتن، ئەوا چوارچێوەی هاوئاهەنگی پەرلەمانتارەکانی سەرپشک کردووە دەنگ بە کام بەربژێر دەدەن."
بەگوتەی دیفاعی، لە ئەگەری رێکنەکەوتنی ماڵی کورد، لایەنەکانی نێو چوارچێوەی هاوئاهەنگی بەگوێرەی رێککەوتن و نزیکییان لەگەڵ هەر لایەنێک، دەنگ بە بەربژێری ئەو لایەنە دەدەن.
تاوەکو ئێستا پارتی دیموکراتی کوردستان و یەکێتیی نیشتمانیی کوردستان لەسەر پۆستی سەرۆککۆمار نەگەیشتوونەتە رێککەوتن؛ پارتی (فوئاد حوسێن) و یەکێتی (نزار ئامێدی)ی بۆ ئەو پۆستە بەربژێر کردووە.
سەبارەت بە دەستوەردانی دەرەکی و پەیوەندییەکانی بەغدا و واشنتن، هومام حەموودی گوتی: "چوارچێوەی هاوئاهەنگی هەوڵدەدات لەگەڵ ئەمریکا وەکو دەوڵەت بۆ دەوڵەت و لە چوارچێوەی رێککەوتنی ستراتیژی مامەڵە بکات."
جەختیشی کردەوە رێگەدان بە دەستوەردانی دەرەکی بە هەر پاساوێک بێت رەتکراوەیە و بە مانای "کردنەوەی رێگەیە بۆ دەستوەردانی زیاتر لە داهاتوودا."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ