رووداو دیجیتاڵ
وەزارەتی ناوخۆی عێراق دەڵێت، پلانێکی ئەمنیی چوار تەوەریان بۆ پاراستنی ئاسایشی رۆژانی دەنگدانی تایبەت و گشتی ئامادە کردووە و تیمە تایبەتمەندەکانیش 24 کاژێر کاردەکەن بۆ وەرگرتنی پەیوەندیی هاووڵاتییان.
عەباس بەهادلی، گوتەبێژی وەزارەتی ناوخۆی عێراق، رۆژی یەکشەممە، 9ـی تشرینی دووەمی 2025، بە تۆڕی میدیایی رووداوی راگەیاند: "بەڕێوەبەرایەتیی کۆنترۆڵ و وەڵامدانەوە پلانەکەی بە هاوئاهەنگیی کۆمیسیۆنی باڵای سەربەخۆی هەڵبژاردنەکان ئامادە کردووە".
بە گوتەی گوتەبێژی وەزارەتی ناوخۆی عێراق، پلانە چوار تەوەرییەکە بریتییە لە:
یەکەم: وەڵامدانەوەی پەیوەندی و پرسیاری کارمەندانی ئەمنی لە رۆژی دەنگدانی تایبەت و پێشکێشکردنی پشتیوانیی تەکنیکی و زانیاری.
دووەم: دابینکردنی وەرگێڕانی راستەوخۆ بە شەش زمان بۆ چاودێر و میدیا بیانییەکان بە درێژایی 24 کاژێر، بۆ وەرگرتنی سکاڵا یان پەیوەندیی چاودێرە نێودەوڵەتییەکان و رێکخراوە نێودەوڵەتییەکان و میدیا بیانییەکان کە چاودێریی پرۆسەی دەنگدان دەکەن لە رۆژانی دەنگدانی تایبەت و گشتی.
سێیەم: وەرگرتنی پەیوەندیی هاووڵاتییان لە هەموو پارێزگاکان لە کاتی روودانی هەر سەرپێچییەک، رووداوێک یان داواکردنی یارمەتیی بەپەلەی تەندروستی، ئەمنی یان هەر دۆخێکی دیکە.
چوارەم: هاوئاهەنگی راستەوخۆ لەگەڵ کۆمیسیۆنی هەڵبژاردنەکان بۆ وەرگرتنی سکاڵا و پرسیاری هاووڵاتییان و زانینی شوێنی بنکەکانی دەنگدان و نوێکردنەوەی کارتی دەنگدان لە کاتی روودانی هەر کێشەیەک لەڕێگەی پەیوەندیکردن بە 911.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ