هەڵەیەک روویدا! دووبارە هەوڵبدە
رووداو دیجیتاڵ
میکانیزمى ئەمنیى باڵاى عێراق و تورکیا داوایان کرد رێز لە سەروەرى و پارێزراوى خاکى هەردوو وڵات بگیرێت و جەختیان لە گرنگى جێبەجێکردنى داواکارییەکەى عەبدوڵڵا ئۆجەلان، بۆ هەڵوەشاندنەوە و چەکدانانى پەکەکە کردەوە. هەروەرها بە پێویستیان زانى لیژنەى هاوبەش پێکبهێنرێت بۆ دۆزینەوەى چارەسەر بۆ کەمپى هۆل و رۆژ و کەمپەکانى دیکە لە سووریا.
ئەمڕۆ یەکشەممە 13ى نیسانى 2025، پێنجەمین کۆبوونەوەى میکانیزمى ئەمنیى باڵاى عێراق و تورکیا لە شارى ئەنتاڵیای تورکیا ئەنجام درا.
وەزارەتى دەرەوەى عێراق راگەیێنراوى هاوبەشی کۆبوونەوەکەى بڵاوکردووەتەوە، هەردوولا داوایان کردووە رێز لە سەروەرى و پارێزراوى خاکى هەردوو وڵات بگیرێت، هەروەها هاوئاهەنگى و هاریکاری لە بوارى سەربازی و ئاسایشى سنوور و بنەبڕکردنى تیرۆر و پیشەسازیى بەرگریى و وزە و ئاو و پڕۆژەى رێگەى گەشەپێدان زیاتر بکرێت.
بەشدارانى کۆبوونەوەکە جەختیان لە گرنگى جێبەجێکردنى داواکارییەکەى عەبدوڵڵا ئۆجەلان بۆ هەڵوەشاندنەوە و چەکدانانى پەکەکە کردەوە.
رۆژی 27ى شوباتى 2025، شاندی دەم پارتی لە ئیستەنبووڵ پەیامی ئاشتیی عەبدوڵڵا ئۆجەلانیان راگەیاند کە تێیدا داواى لە پەکەکە کرد چەک دابنێت و خۆى هەڵبوەشێنێتەوە.
لەبارەى ئەوەى پەیوەندارە بە "میکانیزمى پێنج قۆڵى" لە سووریا و وڵاتانى دراوسێى بۆ رووبەڕووبوونەوە تیرۆر کە لە 9ى ئادارى 2025 لە ئوردن پێکھێنرا، لیژنەى ئەمنیی عێراق و تورکیا جەختیان کردەوە لەوەی ناوەندێکى ئۆپراسیۆنى هاوبەش بۆ ئەو مەبەستە پێکبهێنرێت.
ئەو میکانیزمە لە نێوان وڵاتانى سووریا، تورکیا، عێراق، ئوردن و لوبنان پێکهێنرا بۆ رووبەڕووبوونەوەى مەترسییەکانى تیرۆر و تووندکردنەوەى سنوورەکان.
لە راگەیێندراوەکەى تورکیا و عێراقدا هاتووە: "پێویستە لیژنەى هاوبەش پێکبهێنرێت بۆ دۆزینەوەى چارەسەر بۆ کەمپى هۆل و رۆژ و کەمپەکانى دیکە لە سووریا".
بە گوێرەى راگەیێنراوەکە، شاندى هەردوولا باسیان لەوە کردووە کە رۆژى 8ى ئایارى 2025، محەممەد شیاع سوودانى، سەرۆکوەزیرانى عێراق سەردانى تورکیا دەکات و لەو کۆبوونەوەیەدا تاوتوێى ئەو سەردانەیان کردووە کە تێیدا چوارەمین کۆبوونەوەى ئەنجوومەنى باڵاى هاریکاریى ستراتیژیى نێوان هەردوو وڵات ئەنجام دەدرێت.
لەو کۆبوونەوەیەدا فوئاد حوسێن، وەزیرى دەرەوەى عێراق، سابت عەباسی، وەزیرى بەرگرى و رێبەر ئەحمەد، وەزیرى ناوخۆى حکومەتى هەرێمى کوردستان و راوێژکارى ئاسایشى نەتەوەیی عێراق، سەرۆکى دەستەى حەشدی شەعبی و سەرۆکى دەزگاى هەواڵگرى نوێنەرایەتى عێراقیان کردووە.
بەشدارانى کۆبوونەوەکە پێشوازییان لە ئەنجامى ئەرێنى کۆبوونەوەى نێوان شاندى ئەمریکا و ئێران کردەوە کە 12ى نیسان لە مەسقەتى پاتەختى عومان ئەنجامدرا. عێراق و تورکیا جەختیان لەوە کردەوە کە بەردەوامبوونى ئەو دیالۆگانە رێگە خۆش دەکات بۆ چارەسەرێکى ئاشتییانە بۆ ململانێکان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ