رووداو دیجیتاڵ
ژمارەیەک پەرلەمانتاری عێراق، بە سەرۆکایەتیی پەرلەمانتار محەممەد نووری خوزاعی، داواکارییەکی فەرمییان ئاراستەی موحسین مەندەلاوی، جێگری یەکەمی سەرۆکی پەرلەمانی عێراق کرد و تێیدا داوای لەسەرکارلادانی مەحموود مەشهەدانی، سەرۆکی پەرلەمان دەکەن، ئەمەش لەسەر بنەمای لێدوانێک، کە تێیدا گوتبووی "شوناسی عێراق سەخیفانەیە" و ئەمەیان بە سووکایەتیکردن بە عێراق داناوە.
محەممەد نووری خوزاعی، ئەندامی پەرلەمانی عێراق رۆژی دووشەممە (14ی تەممووزی 2025)، بە تۆڕی میدیایی رووداو، رایگەیاند: "ئەو داواکارییەی پێشکێشی سەرۆکایەتیی پەرلەمانی عێراق کراوە، دوای لێدوانە نابەرپرسانەکانی مەشهەدانی دێت، کە بە پێشێلکردنی ئەو سوێندە دەستوورییە دادەنرێت کە خواردوویەتی" و جەختی کردەوە کە "ژمارەی واژۆکان تاوەکو ئێستا 80 واژۆی تێپەڕاندووە."
محەممەد نووری جوزاعی، کە لەسەر لیستی بزووتنەوەی ئیمتیدات لە پارێزگای قادسیە بووەتە پەرلەمانتار، گوتی: "تاکڕەویی مەشهەدانی لە بڕیاردان و لێدوانەکانیدا، رەنگدانەوەی ئاراستەیەکی نوێی تائیفییە کە هەڕەشە لە سەقامگیریی دۆخی سیاسی و وڵات بەگشتی دەکات."
مەحمود مەشهەدانی دوێنێ لە چاوپێکەوتنێکی تەلەڤیزیۆنیدا رایگەیاند، عێراق لە مانگی داهاتوودا رووبەڕووی خۆپێشاندان دەبێتەوە و ئەگەری هەیە بەرەو "حکومەتی باری نائاسایی" بڕۆن ئەگەر نائارامیی ئەمنی لە عێراقدا دروست بێت. شوناسی عێراقیشی بە "سەخیف " وەسف کرد.
هەروەها مەشهەدانی ئاشکرای کرد، کە ئەمریکا سەبارەت بە حەشدی شەعبی پەیامی بۆ سەرجەم سەرکردە سیاسییەکان ناردووە و گوتبووی: "ئاراستەی ئەمریکا بریتییە لە تێکەڵکردنی حەشد لەگەڵ هێزە ئەمنییەکان، نەک تەنیا رێکخستنەوەی."
رۆژی 31-10-2024 مەحموود مەشهەدانی، کە بەربژێری هاوپەیمانیی عەزم بوو، لەلایەن زۆربەی سوننەکان، چوارچێوەی هاوئاهەنگی و فراکسیۆنە کوردستانییەکانەوە پشتیوانی کرا بە ەنگی 182 پەرلەمانتار بە سەرۆکی نوێی پەرلەمانی عێراق هەڵبژێردرا. ئەمەش دوای ئەوەی 14ی تشرینی دووەمی 2023، بەتۆمەتی گەندەڵی و ساختەکردنی واژۆی دەستلەکارکێشانەوەی پەرلەمانتار لەیس دلێمی، دادگەی باڵای عێراق، ئەندامیێتیی محەممەد حەلبووسی، سەرۆکی پەرلەمانی عێراقی هەڵوەشاندەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ