هەڵەیەک روویدا! دووبارە هەوڵبدە
رووداو دیجیتاڵ
سەرۆکوەزیرانى عێراق پێشوازى کارکردنی کۆمپانیا ئەمریکییەکان لە عێراق کرد، بەتایبەتی لە کەرتی نەوتدا کە پێویستی بە ئاستی پێشکەوتووی تەکنەلۆژیا و پەرەپێدان هەیە، ئەوەش لەپاڵ هەوڵی حکومەت بۆ دەستپێکردنەوەی هەناردەکردن لە رێگەی بۆریی عێراق-تورکیاوە.
محەممەد شیاع سوودانی، سەرۆکوەزیرانى عێراق ئەمڕۆ سێشەممە، 15ى تەممووز لەگەڵ ماتیو زەیس، جێگری سەرۆکی کۆمپانیای HKN ئینێرجیی ئەمریکی و ستیڤن ڤاگن، کاربەڕێکەری باڵیۆزخانەی ئەمریکا لە بەغدا کۆبووەوە.
بەگوێرەى راگەیێندراوى نووسینگەى رۆژنامەڤانى سەرۆکوەزیران، سوودانى خواستی حکومەتەکەى دەربڕیوە بۆ فراوانکردنی تواناکانی کەرتی بەرهەمهێنانی نەوت، لە چوارچێوەی ئەو دیدگایەی کە حکومەتەى پەیڕەوی دەکات و پشت بە زیادکردنی بەرهەم و وەبەرهێنان لە گازی هاوەڵ بەستووە، بۆ گەیشتن بە سەقامگیری لە بواری وزەدا.
لە راگەیێندراوەکەدا هاتووە: "سەرۆکوەزیران پێشوازیی لە کارکردنی کۆمپانیا ئەمریکییەکان لە عێراق کرد، بەتایبەتی لە کەرتی نەوتدا کە پێویستی بە ئاستی پێشکەوتووی تەکنەلۆژیا و پەرەپێدان هەیە، ئەوەش لەپاڵ هەوڵی حکومەت بۆ دەستپێکردنەوەی هەناردەکردن لە رێگەی بۆریی نەوتی عێراق-تورکیاوە".
بەگوێرەى نووسینگەى رۆژنامەڤانى سەرۆکوەزیران، جێگری سەرۆکی کۆمپانیای HKN ئینێرجیی جەختی لە خواستی کۆمپانیاکەی کردەوە بۆ فراوانکردنی وەبەرهێنان لە کەرتی نەوتی عێراقدا .
ئەو کۆبوونەوەیە دواى ئەوە بوو کە کۆمپانیای HKN ئینرجى گرێبەستێکى لەگەڵ کۆمپانیاى نەوتى باکوور واژۆ کرد بۆ زیادکردنى وەبەرهێنان لە کێڵگەى حەمرین کە دەکەوێتە نێوان هەردوو پارێزگاى سەلاحەدین و دیالە.
بەر لە راگەیاندنی ئەو گرێبەستە، بە درۆن هێرشکرایە سەر کێڵگەی نەوتی سەرسنگ، کە ئەو کۆمپانیا ئەمریکییە کاری تێدا دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ