رووداو دیجیتاڵ
دانیشتنی پەرلەمانی عێراق کۆتاییهات و رێژەی یاسایی ئامادە نەبوو.
دوای نیوەڕۆی ئەمڕۆ سێشەممە، 17ی حوزەیرانی 2025 پەرلەمانی عێراق دانیشتنێکی نائاسایی کرد کە تایبەت بوو بە گفتوگۆکردن لەبارەی جەنگی ئیسرائیل و ئێران و پێشێلکردنی سەروەریی عێراق لە جەنگەکەدا.
شێروان دووبەردانی، ئەندامی پەرلەمانی عێراق لە فراکسیۆنی پارتی دیموکراتی کوردستان بە تۆڕی میدیایی رووداوی راگەیاند، رێژەی یاسایی ئامادەبوون بۆ کۆبوونەوەکە نەبوو؛ نزیکەی 140 پەرلەمانتار بەشداربوون و نزیکەی 50 پەرلەمانتار قسەیان لەسەر ئەو بابەتە کرد.
شێروان دووبەردانی گوتی، دوای تەواوبوونی گفتوگۆکان پەرلەمان چوار بڕیاری دەرکرد.
بڕیارەکان بریتین لە:
یەکەم: هاوسۆزی گەلی عێراق لەگەڵ گەلی ئێران دوای هێرشی ئیسرائیل بۆ سەر ئێران.
دووەم: رەتکردنەوەی پێشێلکردنی ئاسمانی عێراق و بەکارهێنانی بۆ دەستدرێژیکردنە سەر وڵاتانی دراوسێ.
سێیەم: پشتگیریکردن لە هەوڵەکانی حکومەت و رێکارەکانی دژی پێشێلکارییەکانی ئیسرائیل بۆسەر سەروەریی ئاسمانی عێراق و پشتگیریکردن لە جووڵە دیپلۆماسییەکانی لەسەر ئاستی ناوچەیی و نێودەوڵەتی.
چوارەم: پتەوکردنی یەکڕیزیی نێوخۆیی بە مەبەستی وەستانەوە دژی هەر کاریگەرییەکی ناوچەیی یان نێودەوڵەتی.
ئەم هەڵوێستەی پەرلەمانی عێراق لەکاتێکدایە، لە بەرەبەیانی رۆژی هەینییەوە جەنگی نێوان ئیسرائیل و ئێران بەردەوامە، ئەمەش دوای ئەوە هات کە ئیسرائیل هێرشی کردە سەر چەند پارێزگایەکی ئێران و تارانیش بە مووشەک وەڵامی دایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ