هەڵەیەک روویدا! دووبارە هەوڵبدە
رووداو دیجیتاڵ
لە راپرسییەکی حکومەتی عێراقدا دەرکەوتووە، کە 37%ـى هاووڵاتییان داواى خزمەتگوزاریى تەندروستی، ئاو و خوێندن لە دەسەڵاتی خۆجێیی پارێزگاکان دەکەن و کەمترین داواکاریش لەسەر فەراهەمکردنى ئاسایشە کە 5%ـە.
هەر بە گوێرەی راپرسییەکەی تیمى راى گشتى لە دەستەى راوێژکارانى ئەنجوومەنى وەزیرانى عێراق، زۆرترین داواکاری بۆ فەراهەمکردنى دەرفەتى کار لە کەرکووکە، لە کاتێکدا سەڵاحەدین بێ هیواترین و بەسرە گەشبینترینن لەوەى ئەو حکومەتە خۆجێییانە دەتوانن پێشکێشى بکەن.
راپرسییەکە لە 15 پارێزگا ئەنجام دراوە لەبارەى ئەوەى هاووڵاتی چی لە حکومەتى خۆجێیی چاوەڕوان دەکات.
لە راپرسییەکەدا 19 هەزار و 433 کەس لە 15 پارێزگاکە بەشدارییان کردووە و تێیدا دەردەکەوێت کە 37.88%ـى بەشداربووان داواى خزمەتگوزارییەکانی تەندروستى، ئاو، خوێندن دەکەن و کەمترین داواکاریش بۆ فەراهەمکردنى ئاسایشە کە 5.99%ـى بەشدارانى ئەو راپرسیەیە.
%35.14ـى بەشداربووانى راپرسییەکە داواى دەرفەتى کار و پاڵپشتى وەبەرهێنانیان کردووە، لەکاتێکدا 20.98% ئاماژەیان بەوەداوە کە چاوەڕوانى هیچ دەستکەوتێک لە حکومەتە خۆجێییەکان ناکەن.
18ـی کانوونى یەکەمى 2023، دوای 10 ساڵ هەڵبژاردنى ئەنجوومەنى پارێزگاکان لە عێراق کرا و تاوەکو ئێستا حکومەتى جۆجێیی دیالە و کەرکووک بەهۆى رێکنەکەوتن لەسەر پۆستى پارێزگار پێکهێنەهێندراون.
لە بابەتی فەراهەمکردنى ئاسایشدا زۆرترین داواکارى لە پارێزگاى میسان بووە، کە 22.22%ـی بەشداربووانى راپرسییەکە لەو پارێزگایە داوای دەستەبەرکردنى ئاسایشیان کردووە، لەکاتێکدا تەنیا 2.74%ـی بەشدارانى راپرسییەکە لە پارێزگاى واست وەک کەمترین رێژە داواى ئاسایشیان لە حکومەتی خۆجێیی کردووە.
کەرکووک لە ریزبەندى یەکەمى خواستى هاووڵاتییان دێت بۆ ئەنجامدانی وەبەرهێنان و رەخساندنی دەرفەتى کار کە 44.95%ـی بەشدارانى راپرسییەکە داوایان کردووە، لەکاتێکدا دیوانییە لە ریزبەندی دوایین کەمترین خواستی هاووڵاتییان بۆ دەرفەرتى کار و پاڵپشتى وەبەرهێنان بە رێژەى 28.84% بەشداربووان دێت.
لە پرسى داواکاریى خزمەتگوزارییەکانى تەندروستى، خوێندن، ئاودا بەشدارانى راپرسییەکە لە بەغدا لەریزبەندى یەکەمدان و 43.34%ـی بەشداربووانى ئەو راپرسییە بەو ئاراستەیە بووە، لەکاتێکدا کەمترین رێژەى داواکارى خزمەتگوزارى لە میسان بووە بە رێژەی 25.17% ـى بەشداربووانى راپرسییەکە.
"بێ هیواترین" بەشداربووانى راپرسیەکە لە حکومەتە خۆجێییەکان لە پارێزگاى سەلاحەدین بووە کە 35%ـى بەشداربووانى راپرسییەکە لەو پارێزگایەدا چاوەڕوانى هیچ دەستکەوتێک لە حکومەتى خۆجێیی نین؛ گەشبینترین بەشدارانى راپرسییەکەش لە حکومەتى خۆجێیی بریتییە لە پارێزگاى بەسرە کە تەنیا 10.40% یان هیچ چاوەڕوانییەکیان لێی نییە.
تیمى راى گشتى ژمارەیەک لە پسپۆڕان و کەسانی ئەکادیمی تێیدا ئەندامە کە سەر بە دەستەى راوێژکارى سەرۆکوەزیرانن و ئەوە پێنجەم راپۆرت و راپرسییە کە لە ساڵى 2023ـەوە ئەنجامی دەدات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ