هەڵەیەک روویدا! دووبارە هەوڵبدە
رووداو دیجیتاڵ
بەڕێوەبەری دەستەی گشتیی گومرگی عێراق دەڵێ، رێژەی گومرگی سەر پێداویستییەکانی سیستمی بەرهەمهێنانی وزەی خۆر کراوەتە 5% و خاڵە گومرگییەکانیشی لێ ئاگادار کراوەتەوە.
سامر قاسم، بەڕێوەبەری گشتیی دەستەی گشتیی گومرگی عێراق بە تۆڕی میدیایی رووداوی راگەیاند، بە نووسراوی فەرمی تیمەکانی یەکخستنی پڕۆژەی بەئەلیکترۆنیکردن و نوێکردنەوەی گومرگی ئاگادارکردووەتەوە کە رێژەی گومرگی پێداویستییەکانی بەرهەمهێنانی کارەبا لە رێگەی وزەى خۆرەوە 5% دەبێت، کە ئەویش لە پێناسی نوێی گومرگی دیاریکراوە.
پێناسی نوێی گومرگ لە یەکی کانوونی دووەمی ئەم ساڵەوە کاری پێ دەکرێ و لەگەڵ نزیکبوونەوەى وەرزى گەرما پێشبینی دەکرێ هاوردەکردنى ئەو کەرەستە و پێداویستییانە زیاد بکات.
بەڕێوەبەری گشتیی دەستەی گشتیی گومرگی عێراق رایگەیاند، گومرگی سەر کەرەستەکانی تایبەت بە بەرهەمهێنانی وزەی خۆر، پانێڵ، پاتریی لیسیۆم و کێبڵى کارەبایی دەگرێتەوە کە گومرگی هەر یەکێکیان 5% دەبێت.
لە عێراق نرخی پانێڵێکی بەرهەمهێنانی کارەبا لە رێگەی تیشکی خۆر، بەگوێرەی توانا و قەبارەکانی، لەنێوان 80 بۆ 400 دۆلاردایە.
بانکی ناوەندیی عێراق لە رێگەی هەشت کۆمپانیای تایبەت بە دانانی پانێڵی وزەی خۆر، لە چوارچێوەی دەستپێشخەریی وزەی نوێبووەوە، بە قەرز دەداتە هاووڵاتییان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ