هەڵەیەک روویدا! دووبارە هەوڵبدە
رووداو دیجیتاڵ
موقتەدا سەدر داوا لە شوێنکەوتووانى مەزهەبی شیعە دەکات هاوکارى ژنەکانیان بکەن لە کاروبارى ناو ماڵ، ئەگەرنا لەهیچ شتێکدا شوێنکەوتووى ئیمام عەلى نابن و دەڵێت: "لە شوشتنەوەی نیسک و هاوکاریکردنی ژن و خزمەتکردنی منداڵ لوتبەرز مەبن بۆ ئەوەی چاکەتان بۆ بنووسرێت".
یەکشەممە 22ـی شوباتی 2026، موقتەدا سەدر، سەرۆکی رەوتی نیشتمانیی شیعە، لە پۆستێکی ئێکسدا نووسینێکی لەبارەی پرسی ژن و هاوکاریکردنی لە کاروباری ماڵدا بڵاوکردەوە.
موقتەدا سەدر ئاماژەی بەوە داوە، زۆرینەی کۆمەڵگە، بەتایبەت کۆمەڵگەی عەرەبی و ئەوەی سرووشتێکی خێڵەکیی هەیە، دوورە لە تایبەتمەندیی هاوکاریکردنی ژن لەلایەن مێردەکانیانەوە لە کاروباری ماڵ و خزمەتکردنی منداڵ.
رێبەری رەوتی سەدر پەیامەکەی ئاراستەی شوێنکەوتووانی مەزهەبی شیعە کردووە و ئاماژە بەوە دەکات، هەر کەسێک لەوەدا لوتبەرزی بکات، لە هیچ شتێکدا لە شوێنکەوتووانی ئیمامی عەلی نییە کە مەبەست لەوانەیە کە لە خواردن و خواردنەوەدا لوتبەرزانە لە ماڵدا مامەڵە دەکەن، یان ئەوانەی بە تووندوتیژییەوە مامەڵە لەگەڵ ژن و منداڵەکانیان دەکەن و لێیان دەدەن، یان قسەی نەشیاویان پێ دەڵێن.
موقتەدا سەدر دەڵێت، "ئەى شوێنکەوتووانی عەلی (سڵاوی خوای لێ بێت)، لە شوشتنەوەی نیسک و هاوکاریکردنی ژن و خزمەتکردنی منداڵ لوتبەرز مەبن بۆ ئەوەی چاکەتان بۆ بنووسرێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ