رووداو-هەولێر
خەمیس خەنجەر، سەرۆکی هاوپەیمانیی سەروەریی سوننەکان، کە خاوەنی 62 کورسییە لە پەرلەمانی عێراق رایگەیاند: "لێکتێگەیشتن لە نێوان هاوبەشانی نیشتمان باشترە لە پشتبەستن بە دەستوەردانی دەرەکی بۆ خەیاڵێک کە دەستیان پێیناگات"؛ ئەمەش ئاماژەیەکی ناڕاستەوخۆیە بۆ چوارچێوەی هاوئاهەنگی و هاوپەیمانەکانی.
خەمیس خەنجەر لە هەژماری خۆیدا لە تویتەر دەڵێت: "لێکتێگەیشتن لە نێوان هاوبەشانی نیشتمان باشترە لە پشتبەستن بە دەستوەردانی دەرەکی؛ هەروەها ئەو هاوبەشییە لەبارترە بۆ پێکهێنانی سیستمێکی دەسەڵاتداریی دادپەروەر".
خەمیس خەنجەر دەشڵێت: "تەنیا ئەوانەی کە هەڵپەی کورسییانە لە دەرگای لایەنی دەرەکی دەدەن بۆ خەونێکی فەوتاو و خەیاڵێک کە دەستیان پێیناگات. بەردەوامین لە هاوپەیمانیی رزگارکردنی نیشتمان".
دوای سەرنەکەوتنی هەوڵەکانی هاوپەیمانیی سێقۆڵیی ناسراو بە 'هاوپەیمانی رزگارکردنی نیشتمان' لە نێوان رەوتی سەدر و پارتی دیموکراتی کوردستان و هاوپەیمانی سەروەریی سوننەکان بۆ هەڵبژاردنی سەرۆککۆمار، بەهۆی ناکۆکیی هاوپەیمانیی سێقۆڵی لەگەڵ چوارچێوەی هاوئاهەنگی شیعە و هاوپەیمانەکانی.
ئێستا پرۆسەی سیاسیی عێراق لە قۆناخی هەوڵی هەڵبژاردنی سەرۆککۆماری نوێدا چەقیبەستووە، چونکە بەپێی دەستوور دەبێ پەرلەمان سەرۆککۆمار هەڵبژێرێت ئینجا دەست بە پرۆسەی پێکهێنانی حکومەتی نوێ بکرێت، لە کاتێکدا تاوەکو ئێستا بەهۆی بایکۆتی چوارچێوەی هاوئاهەنگی و هاوپەیمانەکانی نەتوانرا دانیشتنی پەرلەمان بۆ هەڵبژاردنی سەرۆککۆمار سازبکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ