سکرینشۆت لە ڤیدیۆ بڵاوکراوەکەی مقاوەمەی ئیسلامی.
رووداو دیجیتاڵ
گرووپە چەکدارەکانی شیعە، کە خۆیان بە مقاوەمەی ئیسلامیی لە عێراق دەناسێنن، گرتەیەکی ڤیدیۆییان بڵاوکردەوە، گوایە شەوی رابردوو بە درۆنێک کە وێنەی کوژراوەکانیانی پێوەیە، هێرشیان کردووەتە سەر بنکەی عەین ئەسەد لە ئەنبار
گرووپەکە لە راگەیێندراوێکدا لەبارەی ئەو هێرشەوە بۆ سەر بنکەی سەربازیی عەین ئەسەد دەڵێت، "بە درۆنێک هێرشمان کردە سەر بنکەی داگیرکراوی عەین ئەسەد لە رۆژئاوای عێراق."
ئەو گرووپە گرتەی ڤیدیۆیی ئەو درۆنەشی بڵاوکردووەتەوە، کە گوایە هێرشەکەی پێکراوە، لەسەر باڵی درۆنەکە، وێنەی هەریەک لە موشتاق تاڵیب سعێدی، بەرپرسی سەربازیی بزووتنەوەی نوجەبا و عەلی نایف یاریدەدەری هەیە، کە لە هێرشێکی هێزەکانی ئەمریکا بۆ سەر بارەگایەکی حەشدی شەعبی لە بەغدا لە رۆژی 4ـی ئەم مانگە کوژران.
لەدوای هێرشەکانی بزووتنەوەی حەماسی فەلەستینی بۆ سەر ئیسرائیل لە 7ـی ئۆکتۆبەری 2023، بەگوێرەی وەزارەتی بەرگریی ئەمریکا- پێنتاگۆن، مقاوەمەی ئیسلامی - شیعە، زیاتر لە 140 جار هێرشی کردووەتە سەر سەربازانی ئەمریکا لە عێراق و سووریا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ