هەڵەیەک روویدا! دووبارە هەوڵبدە
رووداو دیجیتاڵ
راوێژکارى سەرۆکوەزیرانى عێراق بۆ کاروباری ئاو راگەیاند، ئەوەى لە عێراق دا هەیە کەمئاوییە، بەڵام یەک هەنگاو لە وشکەساڵییەوە دوورن. دەشڵێت 80٪ بۆ 85%ـی ئاوى عێراق، بۆ کشتوکاڵ بەکاردەهێندرێت.
ئەو گوتانەى تورهان موفتى، راوێژکارى سەرۆکوەزیرانى عێراق بۆ کاروبارى ئاو لە یەکەم پانێڵى دووەم رۆژى سێیەمین کۆڕبەندی ساڵانەی هەولێر بوو، کە ئەمڕۆ (پێنجشەممە، 27ـی شوبات) بەڕێوەچوو.
"عێراق یەک هەنگاو لە وشکەساڵى دوورە"
تورهان موفتى ئاماژەى بەوەدا؛ ئەوەى ئێستا لە عێراق روودەدات، بەدەرنییە لە ئاڵنگارییەکانى گۆڕانى کەشوهەوا. گوتیشی، بودجەى تەرخانکراو بۆ رووبەڕووبوونەوەى وشکەساڵى؛ 50 بۆ 90 ملیار دینارە.
عێراق یەکێکە لەو پێنج وڵاتەى جیهان، کە زۆرترین کاریگەرییەکانى وشکەساڵیی لەسەر دەبێت.
راوێژکارى سەرۆکوەزیرانى عێراق بۆ کاروبارى ئاو، ئاماژەى بەوەدا لە 15 ساڵى رابردوودا، لە عێراق یەک ساڵى باراناوى و دوو ساڵ بێبارانى هەبووە، بەڵام ئێستا ساڵێکى باراناوى و سێ بۆ چوار ساڵی بێ بارانى هەیە.
تورهان موفتى گوتى "سەرەڕاى ئەوە، هێشتا لە عێراق وشکەساڵیمان نییە و کەمئاوى هەیە، بەڵام یەک هەنگاو لە وشکەساڵییەوە دوورین."
''بۆ ئاو، لێکتێگەیشتن هەیە نەوەک رێککەوتن''
رێژەی 75%ـی ئاوى عێراق سەرچاوەکەى وڵاتانى دراوسێیە، 20 بۆ 25%ـى سەرچاوەکەى نێو خاکى عێراقە.
راوێژکارى سەرۆکوەزیرانى عێراق بۆ کاروبارى ئاو گوتی "لەماوەى نێوان ساڵانى 2021 بۆ 2023 بڕى ئەو ئاوەى لە دەرەوەى سنوورەکەى دەگەیشتە عێراق، نزیکەى 73% کەمیکردووە."
سەرچاوەى سەرەکیی ئاوی عێراق هەردوو رووبارى دیجلە و فوراتە، کە سەرچاوەکانیان لە تورکیایە. تورهان موفتى گوتى "رێککەوتن نییە لەگەڵ وڵاتانى دراوسێ لەبارەى پرسى ئاو، ئەوەى هەیە جۆرێک لە لێکتێگەیشتنە دراوسێکانمان پێیانوایە خاوەنى ئاوەکەن و ئەوەى پێویستیانە، دەیبەن ئەوەى لێیان زیاد دەبێت، دەیدەنە عێراق."
بەگوتەى راوێژکارەکەى سەرۆکوەزیرانى عێراق، لەماوەى کەمتر لە ساڵێکدا توانیویانە بە رێککەوتن لەگەڵ تورکیا بڕى ئاوى بەدەستگەیشوو لەو وڵاتەوە بکەنە دووئەوەندەى بڕى پێشتر.
کەمئاوى گوندنشینانى کەم کردووەتەوە
تورهان موفتى ئاماژەى بەوەدا 70 ساڵ لەمەبەر، یەک لەسەر سێیى هاووڵاتیانى عێراق لە شارەکان دا دەژیان و دوو لەسەر سێیان لە گوندەکان بوون، بەڵام ئێستا دۆخەکە جیاوازە 70%ـی دانیشتووان لە شارەکان دا دەژین و 30% لە گوندەکان دەژین.
بەگوێرەى ئەنجامى بنەڕەتیی سەرژمێریی گشتی؛ دانیشتووانى عێراق، 70.17٪ شارنشین و 29.83٪ گوندنشینن.
راوێژکارى سەرۆکوەزیرانى عێراق گوتى "ئەو دۆخە، قەیرانێکى کۆمەڵگەیی بۆ حکومەت دروستکردووە لەوەى پەیوەندیدارە بە دەرفەتى کار و پرسی دیکەوە."
تورهان موفتى ئاماژەى بەوەدا، 10% بۆ 15%ـی سەرچاوەى ئاوى عێراق لە زۆنگاوەکانە، کە دەکاتە 6 بۆ 8 ملیار مەتر سێجا و هاوقەبارەى ئەو ئاوەیە کە لە بەنداوى حەدیسەدا هەیە. دەشڵێت، 80٪ بۆ 85%ـی ئاوى عێراق بۆ کشتوکاڵ بەکاردەهێندرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ