رووداو دیجیتاڵ
دوو سەرچاوەی ئەمنیی عێراق بە تۆڕی میدیایی رووداویان راگەیاند، لە سبەی شەممەوە هێزەکانی ئەمریکا لە چەند ناوچەیەکی بەغدا دەست بە کشانەوە دەکەن. راوێژکاری لیژنەی ئاسایش و بەرگری لە ئەنجوومەنی پارێزگای ئەنباریش دەڵێت، لە عەین ئەسەدیش دەکشێنەوە.
بەگوێرەی ئەو دوو سەرچاوەیەی رووداو، کشانەوەکە لە ناوچەی سەوزی بەغدا، فڕۆکەخانەی بەغدا و بنکەی فەرماندەیی ئۆپەراسیۆنە هاوبەشەکان لە بەغدا دەبێ.
ئەم هەنگاوە لە کاتێکدایە، هێزەکانی هاوپەیمانیی نێودەوڵەتی لە ساڵی 2014ـەوە لەسەر داوای فەرمیی حکومەتی عێراق و بە مەبەستی رووبەڕووبوونەوەی رێکخراوی داعش لە عێراق جێگیرن و پێکهێنەری سەرەکی ئەو هێزەش ئەمریکایە.
ئەو دوو سەرچاوەیە باڵا ئەمنییە ئاماژەیان بەوە کرد، کشانەوەی هێزەکانی ئەمریکا لە چوارچێوەی رێککەوتنی نێوان عێراق و هاوپەیمانی نێودەوڵەتییە و هێزەکانی ئەمریکاش بەرەو هەولێر دەکشێنەوە، نەوەک دەرەوەی عێراق.
بنکەى عەین ئەسەد لە ئەنبار زۆرترین مەشقپێکارى هاوپەیمانیى نێودەوڵەتیى دژی داعشى بە سەرکردایەتیى ئەمریکا لێیە.
هەر ئەمڕۆ عەبدوڵڵا جغێفی، راوێژکاری لیژنەی ئاسایش و بەرگری لە ئەنجوومەنی پارێزگای ئەنبار بە تۆڕی میدیایی رووداوی راگەیاند: "بەگوێرەی زانیارییەکان، کشانەوەی سبەی هێزەکانی ئەمریکا عەین ئەسەدی ئەنباریش دەگرێتەوە."
نزیکەی 2500 سەربازی ئەمریکی لە چوارچێوەی هاوپەیمانیى نێودەوڵەتیى دژی داعش لە عێراق و هەرێمی کوردستان جێگیرکراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ