لیژنەی گواستنەوە و گەیاندنی پەرلەمانی عێراق: وەزیری پێشووی نەوت 68 دۆسیەی گەندەڵیی لەسەرە

 

 

رۆژی یەکشەممە 30-10-2022 زەهرە بجاری، سەرۆکی لیژنەی گواستنەوە و گەیاندن لە پەرلەمانی عێراق بە تۆڕی میدیایی رووداوی گوت، "بەهۆی سەرپێچییەکان و دۆسیەکانی گەندەڵیی ئیحسان عەبدولجەبار، وەزیری پێشووی نەوتی عێراق، ژمارەیەک داواکاریم ئاراستەی ژمارەیەک دامەزراوەی حکومەتی عێراق و دەسەڵاتی دادوەری کردووە و داوام لێکردوون بەهۆی ئەو 68 دۆسیەی لەسەر ناوبراو هەیە گەشتکردنی بۆ دەرەوەی عێراق لێ قەدەخە بکرێت."

 

بە گوتەی سەرۆکی لیژنەی گواستنەوە و گەیاندن لە پەرلەمانی عێراق، "ئەو 68 کەیسەی لەسەر وەزیری پێشووی نەوت هەن، دۆسیەی گەندەڵیی گەورەن؛ بەشێکیان دارایی و بەشێکیان کارگێڕین. زانیاریمان هەیە کە وەزیری پێشووی نەوت لەو کاتەوەی بووە بە وەزیر پاسپۆرتی ژمارەیەک وڵاتی بەدەستهێناوە، ئەوەش لەبری کارئاسانیکردن بۆ کاری کۆمپانیاکانیان لێرە. بۆیە گومانی زۆر دەکەین بەهۆی ئەو پاسپۆرتانەوە بەمنزیکانە عێراق جێبهێڵێت."

 

زەهرە بجاری بە پێویستی دەزانێت، دەزگا پەیوەندیدارەکان رێگە لە چوونەدەرەوەی وەزیری پێشووی نەوت بگرن و ببرێتە بەردەم دادگە بۆ لێپرسینەوە لەگەڵی لەسەر ئەو دۆسیانەی لەسەری کەڵەکە بوون.

 

سەرۆکی لیژنەی گواستنەوە و گەیاندنی پەرلەمانی عێراق ئەوەشی خستەڕوو، "بەپێی راپۆرتێکی چاودێریی دارایی عێراق، بەهۆی گرێبەستێکی نەوتییەوە لەگەڵ دوو کۆمپانیای نەوتی بەریتانی و چینی، تایبەت بە کارکردن لە کێڵگەی رومێلە لە باشووری عێراق، کە دواتر گرێبەستەکە لەگەڵ وەزارەتی نەوت هەموارکراوەتەوە، عێراق لە ماوەی 25 ساڵدا زیانێکی زۆری دارایی بەردەکەوێت کە بە زیاتر لە 825 ملیار دۆلار مەزەندە دەکرێت. یەکێک لە بڕگەکانی هەموارکردنەوەی گرێبەستەکەش بریتییە لە کەمکردنەوەی ئاستی بەرهەمهێنان و هەناردەکردنی نەوتی عێراق بە بڕی 750 هەزار بەرمیل لە رۆژێکدا."

 

ئەو پەرلەمانتارە گوتیشی، "گرێبەستەکە لە ساڵی 2011 کراوە و دواتر هەموارکراوەتەوە. راپۆرتەکەی دیوانی چاودێریی دارایی لە ساڵی 2014 دەرچووە؛ بۆیە هەموو ئەوانەی بەرپرسن لەو گرێبەستە و کەمتەرخەمییان کردووە و زیانە داراییەکانیان پشتگوێخستووە، دەبێت لێپرسینەوەیان لەگەڵ بکرێت، واتە تەنیا مستەفا کازمی، سەرۆکوەزیرانی ئێستا و ئیحسان عەبدولجەبار، وەزیری نەوت بەرپرس نین، بەڵکو چەندین وەزیر و بەرپرسی دیکەی باڵا بەرپرسن، ئەوانەی کێشەکەیان چارەسەر نەکردووە و بەرپرسیارێتییان دەکەوێتە ئەستۆ."