رووداو دیجیتاڵ
هێزەکانی ئاسایشی ناوخۆ لە هەرێمی جەزیرەی رۆژاڤای کوردستان رایگەیاند، کاروانێکی هێزەکانی ئاسایشی حکومەتی سووریا لە شاری حەسەکە رووبەڕووی هێرشێکی چەکداری بوونەتەوە و بەو هۆیەوە قەدەخەی هاتووچۆ لە ناوچەکە راگەیەندراوە.
هێزەکانی ئاسایشی ناوخۆی رۆژاڤای کوردستان، ئەمڕۆ سێشەممە، 3ـی شوباتی 2026، دەڵێت، هێرشەکە لە کاتی جێبەجێکردنی رێککەوتنی نێوان دیمەشق و هەسەدەدا روویداوە، کاتێک هێزەکانی ئاسایشی ناوخۆ سەرقاڵی دابینکردنی دەروازە بوون بۆ چوونە ناوەوەی هێزە ئەمنییەکانی حکومەتی سووریا بۆ ناو شاری حەسەکە. ئاسایش دەڵێت: "کاروانەکە لەلایەن چەند شانەیەکی تیرۆریستییەوە تەقەی راستەوخۆی لێکراوە بە مەبەستی دروستکردنی پشێوی و تێکدانی سەقامگیریی ناوچەکە".
هێزەکانی ئاسایش ئاماژەیان بەوە کردووە کە دەستبەجێ وەڵامی سەرچاوەی تەقەکانیان داوەتەوە و لە ئەنجامی ئۆپەراسیۆنێکی گەڕان و پشکنیندا، توانیویانە ژمارەیەک لە ئەندامانی ئەو شانە تیرۆریستییانە دەستگیر بکەن کە لێکۆڵینەوە لەگەڵیاندا بەردەوامە. هەروەها رایانگەیاندووە کە لە کاتی جێبەجێکردنی ئەرکەکەدا، ئەندامێکی هێزەکانی ئاسایش بریندار بووە و ئێستا لەژێر چارەسەری پزیشکیدایە.
وەک رێکارێکی خۆپارێزی بۆ پاراستنی گیانی مەدەنییەکان و رێگریکردن لە هەر جووڵەیەکی دیکەی تێکدەرانە، هێزەکانی ئاسایش قەدەخەی هاتووچۆی کاتییان لە ناوچەکەدا سەپاندووە. لە کۆتایی راگەیێندراوەکەدا جەخت لەوە کراوەتەوە کە ئەرکی خۆیان بە سەرکەوتوویی و بەبێ زیانی مەدەنی ئەنجام داوە و پابەندی تەواوی خۆیان بە رێککەوتنەکان و پاراستنی ئاسایشی گشتی دووپات دەکەنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ