رووداو دیجیتاڵ
سەرچاوەیەکی تایبەت بە تۆڕی میدیایی رووداوی راگەیاند، ئەسعەد شەیبانی، وەزیری دەرەوەی سووریا چەند پێشنیازێکی بۆ هەسەدە ناردووە. ئاماژەی بەوەش کرد، مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری سووریا بە تەلەفۆن قسەیان کردووە.
بڕیاربوو ئەمڕۆ مەزڵووم عەبدی، فەرماندەی گشتیی هەسەدە سەردانی دیمەشق بکات و لەگەڵ ئەحمەد شەرع کۆببێتەوە. ئەو سەرچاوەیە تایبەتەی رووداو دەڵێت، سەردانەکە ئەمڕۆ ئەنجام نەدراوە.
لەبارەی ئەنجامی پەیوەندییە تەلەفۆنییەکەی نێوان عەبدی و شەرع، ئەو سەرچاوەیە ئەوەی خستەڕوو، "ئەگەری راگەیاندنی ئاگربەست و سەردانی مەزڵووم عەبدی بۆ دیمەشق لە ماوەی داهاتوودا هەیە."
سەرچاوەیەکی دیکە لە هەسەدە ئەمڕۆ لەبارەی دۆخی ناوچەکە بە رووداوی گوت، "سوپای عەرەبیی سووریا دەبابەی هێناوەتە ئەوبەری فورات و تۆپبارانی رەققە دەکات."
لە بەرپەرچدانەوەی هێرشەکانی سوپای عەرەبیی سووری، شەڕڤانێکی هەسەدە بە رووداوی گوت: "لە بەنداوی تشرین سێ هێرشمان تێکشکاندوون، لە فوراتیش بە درۆنی برووسک لە چەکدارەکان دەدەین و بەرگری دەکەین."
دوو رۆژە گرژییەکانی نێوان سوپای عەرەبیی سووریا و هەسەدە دەستیانپێکردووە، هەرچەندە فەرماندەی گشتیی هەسەدە گوتی کە لە دێر حافر و مەسکەنە هێزەکانیان دەکشێننەوە، بەڵام بەبێ رێککەوتنی پێشوەختە لە دێرەزووریش سوپا هێرشی کردەسەر شەڕڤانان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ