رووداو دیجیتاڵ
بەپێی داتاکانی دامەزراوەی ئاماری تورکیا، لە چارەکی چوارەمی 2025ـدا ژمارەی بێکاران بەراورد بە چارەکی پێشوو، 58 هەزار کەس کەمی کردووە و گەیشتووەتە دوو ملیۆن و 913 هەزار کەس، بەڵام رێژەی بێکاریی لەنێو ئافرەتانی گەنجدا زیادیکردووە.
دامەزراوەکە رۆژی چوارشەممە، 18ـی شوباتی 2026، ئامارەکانی بێکاریی چارەکی چوارەمی 2025ـی بڵاوکردەوە. بەگوێرەی داتاکانی دامەزراوەکە، لە تورکیا و باکووری کوردستان رێژەی بێکاری لە ئاستی 8.2٪دا بووە.
داتاکان ئاماژە بە کەمبوونەوەیەکی سنووردار لە رێژەی بێکاری و زیادبوون دامەزراندن و بەشداری لە هێزی کاردا دەکەن.
58 هەزار کەسی بێکار کەمی کردووە
بەپێی ئەو داتایانەی کاریگەریی وەرزەکانیان لەسەر لابراوە، ژمارەی بێکاران لە تەمەنی 15 ساڵ و سەرووتر لە چارەکی چوارەمی ساڵی 2025ـدا بەراورد بە چارەکی پێشوو 58 هەزار کەس کەمی کردووە و بۆ دوو ملیۆن و 913 هەزار کەس دابەزیوە. رێژەی بێکاری 0.2 خاڵ دابەزیوە و بووەتە 8.2٪
رێژەی بێکاری لەنێو پیاواندا بە 6.7٪ و لەنێو ژناندا بە 11.1٪ خەمڵێندراوە.
لە هەمان وادەدا، ژمارەی دامەزراوان بەراورد بە چارەکی پێشوو 136 هەزار کەس زیادیکردووە و بۆ 32 ملیۆن و 686 هەزار کەس بەرزبووەتەوە. رێژەی دامەزراندن کە کاریگەریی وەرزەکانی لەسەر لابراوە، 0.1 خاڵ بەرزبووەتەوە و گەیشتووەتە 49.1٪.
ئەم رێژەیە لەنێو پیاواندا بە 66.7٪ و لەنێو ژناندا بە 31.9٪ تۆمارکراوە.
بێکاری لەنێو ژنانی گەنجدا زیادیکردووە
هێزی کار، لەو ماوەیەدا 78 هەزار کەس زیادیکردووە و گەیشتووەتە 35 ملیۆن و 599 هەزار کەس. رێژەی بەشداریکردن لە هێزی کاردا 0.1 خاڵ بەرزبووەتەوە و بە 53.5٪ هەژمار کراوە. رێژەی بەشداریکردن لە هێزی کاردا لەنێو پیاواندا 71.5٪ و لەنێو ژناندا 35.9٪ بووە.
رێژەی بێکاری لەنێو گەنجانی تەمەن 15-24 ساڵدا بەراورد بە چارەکی پێشوو 0.3 خاڵ دابەزیوە و گەیشتووەتە 14.9٪. لەم گرووپە تەمەنییەدا، رێژەی بێکاری لەنێو پیاواندا 11.8٪ و لەنێو ژناندا 20.7٪ بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ