پێویست ناكات لەسەر حیزب و حكومەت بوەستین

بەپێی ئامارەكان ژمارەی ئۆتۆمبێل لەسەر زەوی 1 ملیار و 400 ملیۆنی تێپەڕاند و پێشی دانیشتووانی چینی دایەوە، ئەمەش مەترسی پیسبوونی ژینگەی جیدیتكرد، بەتایبەت كە دەركەوت ئاستی زیادكردنی ئۆتۆمبێل لە 40 ساڵی رابردووەوە تاوەكو ئەمڕۆ چوار ئەوەندە زیادیكردووە "ساڵی 1976 تەنیا 342 ملیۆن ئۆتۆمبێل هەبووە" wards intelegence.

ئەمڕۆ بابەتی ژینگە بابەتێكی زۆر گرنگە لە جیهاندا، بەرنامەی هەڵبژاردنەكانی لەسەر دادەنرێت، كارنامەی حكومەتەكانی بۆ دەگۆڕدرێت، كۆمەڵگەی مەدەنی پێوە مەشغوڵە و چالاك و نوخبە لۆبی لەسەر دەكەن، بەڵام لە كوردستاندا جگە لەوەی جوڵانەوەی سیاسی سەوز نییە، درووشمی هیچ هێزێكی سیاسیش بەڵێن و بەرنامەی ژینگەیی تێدا نییە.

بەڵام لەگەڵ ئەوەشدا ماوەیەكە لە سۆشیالمیدیای كوردستان هەست بە بەرزبوونەوەی هۆشیاری ژینگەیی دەكرێت و جموجوڵێكی خۆڕسكانە بەدیدەكرێت، باس لە بەكارنەهێنانی پلاستیك دەكرێت و بڕیارە وردە وردە زەرفی كاخەز بەكاربێت، دەیان پۆست لەسەر پاكڕاگرتنی سەیرانگەكان بڵاودەكرێتەوە، ئەمەش خاڵێكی زۆر گرنگە ئەگەر گەشە بكات، بەتایبەت كە سۆشیالمیدیا بووەتە هێزێكی كاریگەر لە كوردستاندا و لۆبیەكی راستەوخۆیە.

ئێمە پێویست ناكات لەسەر حیزب و حكومەت بوەستین، دەكرێ گوشاری خۆمان بكەین و هۆشیاری ژینگەیی بڵاوبكەینەوە.

هەرچەندە لە راستیدا ئێمەی كورد و رۆژهەڵاتی نێوەڕاست بەگشتی بەرپرس نین لە پیسبوونی ژینگەی جیهان و دیاریدەی گەرمبوونی زەوی كە لە رۆژگاری شۆڕشی پیشەسازییەوە تاوەكو ئەمڕۆ بەهۆی كاركردنی كارگە و بڵاوكردنەوەی گازە زیانبەخشەكانەوە 2 پلەی سەدی بەرزبووەتەوە، بەرپرسیش نین لە پەنگخواردنەوەی گەرمی ناو چینی ئۆزۆن بەهۆی بڵاوكردنەوەی كاربۆنەوە كە مەترسی تواندنەوەی بەستەڵەك و نوقمكردنی دەیان هەزار كیلۆمەتر زەوی و تێكچوونی ژینگەی گیانلەبەران و كشتوكاڵی لێكەوتووەتەوە، ئەوەی بەرپرسە لەم مەترسییە زەبەلاحانە وڵاتە زلهێزەكانی جیهان خۆیانن، ئەمەریكا، چین، یەكێتی ئەوروپا، رووسیا و هتد..

بەڵام ئێمە بەرپرسین لە پیسكردنی ژینگەی وڵاتی خۆمان، بەرپرسین لە پاككردنەوەی ئاو و هەواو خاكی هەرێمەكان .