وەک پێشمەرگەیەک، ل ساڵا 1964، ل گوندێ دێرێ، کو وی دەمی بارەگایێ بارزانی ل وێرێ بوو، بۆ جارا ئێکێ ب دیتنا شەهیدێ جانەرمەرگ ئیدریس بارزانی شادبووم و هەتا رۆژا چوویە وەغەرێ کو ل 31/1/1987 بوو، ئەز ئێک ژ وان کەسێن نێزیکێن وی بووم و ل هەموو خۆشی و نەخۆشیێن وی بەردەوام دگەل بووم و، خوە دلخۆش سەرفەراز دبینم کو بۆ دەمێ چەندین ساڵان دخزمەتا ویدا بووم و هەتا ئەز ژی دچمە وەغەرێ، وان رۆژ و ساڵان ژبیرناکەم یێن من دگەل وی بووراندین. ژبەرکو ب راستی شەهید ئیدریس سەرکردە و رێبەر بوو، هەروەسا قوتابییەکێ زیرەکێ قوتابخانەیا بارزانی بوو. ژبەرکو ب دروستی حەژێکەرێ کوردستانێ و ئاخ و هەوایێ وەڵاتێ خوە بوو، هەروەسا هەموو هیڤی و ئۆمێدێن وی ئەوبوون کوردستانەکا سەربخوە ببینیت.
بۆ زانین دگەل گەهشتنا من بۆ دەف نەمر ئیدریس بارزانی ئەز بوومە پرەکا پەیوەندیێ دناڤبەرا مەکتەبا سیاسی یا پارتی دیموکراتی کوردستان و نەمر ئیدریس بارزانی، هەروەسا کاک مەسعود بارزانی دا. ئانکو هەر نامەیەکا هەبا ئەز دا گەهینمە نەمر ئیدریس بارزانی یان مەسعود بارزانی. بۆ زانین وی دەمی پتریا هاتن و چوونا مە ب پییان بوو و، دەمێ من نامەیەک یان پۆستەک دگەهاند، دا خوە ل هیڤییا بەرسڤێ گرم. پاشی جارەکا دی دا ب بەرسڤڤە زڤرمەڤە جهێ ئەز ژێ هاتیم.
جارەکا دی دێ بێژم ئەز ب کارێ خوە گەلەکێ دلخۆشبووم، ژبەرکو ئەز گەنجەکێ خوینگەرم بووم و هەر ئەو بۆ من بەس بوو کو ئەو باوەری داینە من و، ئەڤە ژی شانازییەکا دییە بدەست هەموو کەسان ناکەڤیت.
ژ بیرهاتن و رۆژێن خۆش من دگەل وان بووراندین، ئێک ژ وان ل هەیڤا ئەیلوولا 1965 بوو، کو نەمر مەلا مستەفا بارزانی ژبۆ هەلبژارتنا سکرتێرێ حیزبێ و کۆمیتەیا ناڤەندی، چوویە دەڤەرا قەلادزێ. هەروەسا دەمێ ل ساڵا 1965 دانوستاندن دگەل حکومەتا ئێراقێ تێکچووین، بارەگایێ بارزانی دگەل شەهید ئیدریس و مالا وی چوونە دەڤەرا باڵەکایەتی ل دۆڵا باڵەییان ل وێرێ ئاکنجی بوون. پشتی ماوەیەکی جارەکا دی مەکتەبا سیاسی چوو گوندێ هەڵشۆ و من بەردەوام پۆستە دگەهاندنە ئیدریسێ جانەمەرگ و هەکە ئەو یێ حازر نەبا من ددانە دەستێ کاک مەسعود بارزانی و چ جوداهی دناڤبەرا واندا نەبوو. ژبەرکو هەردوویان وەک تیمەکێ هەڤپشک کارێن حیزبێ برێڤەدبرن. هەروەسا هاریکارییا نەمر مەلا مستەفا بارزانی دکرن و، ل وی دەمی هندەک جاران حەفتیێ دوو جاران بۆ گەهاندنا نامەیان ئەز دچوومە زۆزانێن حاجی عومران. هەروەسا بۆ هەمان کار ئەز دچوومە بارەگایێ هێزا رزگاری ل نێزیک گوندێ سوورداش و هێزا خەبات ل پێنجوین.
ل وان ساڵێن ئەز دگەل، بەردەوام دەرگەهێ شەهید ئیدریس بارزانی بۆ هەر کەسەکی یێ ڤەکری بوو. ئانکو دیتنا وی یا ب ساناهی بوو، بۆ هەر ئاریشەیەکێ یان داخوازییەکێ چارەیەک بۆ دکر و نەدهێلا چو جاران کەسەک بێ ئۆمێد ژ دەف وی دەرکەڤیت و هەتا رۆژا چوویە وەغەرێ، کو مرنا وی یا سرووشتی بوو، لێ حکومەتا ئێراقێ یا وی دەمی بۆ خوە کرە ناڤ و د راگەهاندنا خوە دا گۆت؛ فرۆکەیێن مە ئەو کوشتییە. لێ د راستیێ دا ئەوە دووژمنا درەوەکا ب شاخ بوو و چ راستی بۆ نەبوون.
ل دووماهیێ ب هەلکەفتا بوورینا 38 ساڵان ل سەر وەغەرکرنا ئیدریسێ جانەمەرگ، ئەز سەرێ رێز و قەدرگرتنێ بۆ بابێ رۆحیێ نەتەوەیا کورد، بارزانیێ نەمر و ئیدریسێ هەردەم زیندی و هەموو شەهیدێن کوردستانێ دچەمینم و هیڤییا من ئەوە ل نێزیک ئەم ب دیتنا دەولەتا کوردستانێ ل سەر دەستێ سەرۆک و مەرجەعێ کوردان بەرێز سەرۆک مەسعود بارزانی شاد ببین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ