رووداو دیجیتاڵ
پۆلیسی شارێکی کالیفۆڕنیا دەڵێت، "منداڵێکی تەمەن 10 ساڵیان بە تۆمەتی کوشتنی کوڕێکی هاوتەمەنی خۆی دەستگیر کردووە."
رۆژی دووشەممە 01-01-2024 پۆلیسی شاری ساکرەمێنتۆ لە ویلایەتی کالیفۆڕنیای ئەمریکا، منداڵێکی تەمەن 10 ساڵیان بە تۆمەتی تەقەکردن و کوشتنی منداڵێکی هاوتەمەنی خۆی دەستگیر کرد.
پۆلیس دەڵێت، دوای ئەوەی رۆژی شەممە کاژێر 04:30 پاشنیوڕۆ، پەیوەندییان پێوە کراوە و هەواڵی تەقەکردنیان پێگەیشتووە. لەکاتی گەیشتنی پۆلیس بۆ شوێنی رووداوەکە، منداڵێکیان دۆزیوەتەوە کە خوێن لە سەر و ملی چۆڕاوە و رەوانەی نەخۆشخانە کراوە و لەوێ بەهۆی سەختیی برینەکەیەوە گیانی لەدەستداوە.
بەگوێرەی پۆلیسی ئەو ناوچەیە، کوژراوەکە کوڕە و تەمەنی 10 ساڵە.
پۆلیسی ئەو شارە رایگەیاندووە، تۆمەتباری کوشتنەکە منداڵێکی 10 ساڵە و لە ئۆتۆمبێلەکەی باوکی بۆ کڕینی جگەرە دابەزیوە. ئەو قسەی لەگەڵ کوڕەکەی دیکە کردووە و گوتوویەتی، "باوکم چەکی هەیە" پاشان چەکەکەی هێناوە و گولـلەیەکی تەقاندووە و ئەو کوڕەی کوشتووە، دواتر بەرەو شوقەیەکی نزیک لە شوێنی رووداوەکە رایکردووە.
پۆلیس دەڵێت، کوڕەکەمان دەستگیر کردووە و بە تاوانی کوشتن تۆمەتبار کراوە. هەروەها، ئارکێت دەیڤیسی تەمەن 53 ساڵ، کە باوکی تۆمەتبارەکەیە، دەستگیر کراوە و لە زیندانی ساکرەمێنتۆ دەستبەسەرە.
باوکی ئەو تۆمەتبارە، هەروەک بەڕێوەبەری پۆلیسی ئەو شارە دەڵێت، بە تاوانی هەڵگرتنی چەکی دزراو تۆمەتبار کراوە و بە بڕی 500 هەزار دۆلار سزا دەدرێت و وا بڕیارە رۆژی 03-01-2024 دادگایی بکرێت.
لەبەر کەمیی تەمەنیان، پۆلیس ناسنامەی کوژراو و بکوژەکەی بڵاونەکردووەتەوە.
بەگوێرەی ئاسایشی ئەمریکا، کالیفۆڕنیا یەکێکە لەو ویلایەتانەی کە تاوانی زۆری لێدەکرێت. لەو ویلایەتە لە 1000 کەس 165 کەس تاوان دەکەن و زۆربەی تاوانەکانیش دزیکردنە. ویلایەتی لویزیانا زۆرترین رێژەی تاوانی لێدەکرێت و ویلایەتی ڤێرمۆنت سەلامەتترینە لە ئەمریکا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ