رووداو دیجیتاڵ
بەڕێوەبەرایەتیی فڕۆکەوانیی فیدراڵیی ئەمریکا رایدەگەیێنێت، فڕۆکەیەکی بچووک کەوتووەتە نێو ماڵێکی شاری کلێرواتر لە ویلایەتی فلۆریدا و بەو هۆیەوە چەند کەسێک گیانیان لەدەستداوە.
بەگوێرەی بەڕێوەبەرایەتی فڕۆکەوانیی فیدراڵیی ئەمریکا، فڕۆکەکە کاژێر 7:15 خوولەکی شەوی پێنجشەممە بەکاتی ئەمریکا [کاژێر 3:15 خوولەکی بەیانیی رۆژی هەینی بەکاتی هەولێر] کەوتووەتە نێو ماڵێکەوە و بەوهۆیەوە ماڵەکە ئاگری گرتووە.
سکووت ئێلەر، بەڕێوەبەری بەرگریی شارستانی فلۆریدا لە راگەیێندراوێکدا گوتی: "دەتوانم ئەوە دووپاتبکەمەوە کە چەند کەسێک لەنێو فڕۆکەکە و لەنێو ماڵەکەشدا بوونەتە قوربانی".
تاوەکو ئێستا ئەوە ئاشکرا نەکراوە کە چەند کەس لەنێو فڕۆکەکە و لەنێو ماڵەکەدا بوون.
دانیشتووانی کلێرواتەر رایانگەیاندووە، کە لەکاتی کەوتنەخوارەوەی فڕۆکەکە تەواوی باڵەخانەکانی نزیک لە رووداوەکە هەژاون.
بەڕێوەبەرایەتی فڕۆکەوانی فیدرالیی ئەمریکا ئاشکرای کردووە، فڕۆکەکە لە جۆری Beechcraft Bonanza V35 بووە و پێش کەوتنەخوارەشی تیمی ئەندازیارانی فڕۆکەخانەی ئاگادار کردووەتەوە لەوەی کە کێشەیەک لە بزوێنەری فڕۆکەکەیدا هەیە.
شاری کلێرواتر دەکەوێتە دووری 23 کیلۆمەتر لە شاری تامپا لە کەناراوەکانی ناوەڕاستی رۆژئاوای فلۆریدا و ژمارەی دانیشتووانیشی 110 هەزار کەسە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ