رووداو دیجیتاڵ
لە ویلایەتی ئۆریگنی باکووری رۆژئاوای ئەمریکا، کەسێک لە ناوەندێکی تایبەت بە هاوکاریکردنی بێماڵەکان، بە چەقۆ 11 کەسی بریندار کرد.
رووداوەکە ئێوارەی دووشەممە 02-06-2025 [بەکاتی هەولێر] لە شاری سەیلم، پایتەختی ئۆریگن روویدا. ئەنجێلا هێدریک، گوتەبێژی پۆلیسی سەیلم رایگەیاند، تۆمەتبارێک دەستگیرکراوە.
تاوەکو ئێستا زانیاری لەسەر هۆکاری هێرشەکە، رەچەڵەکی هێرشکارەکە و دۆخی تەندروستیی بریندارەکان بەردەست نییە، بەڵام پۆلیس ئاشکرای کردووە، تۆمەتبارەکە پیاوە.
هێدریک گوتی: "بریندارەکان بۆ نەخۆشخانەی سەیلم گوازراونەتەوە."
رووداوەکە لە ناوەندی یونیەن گۆسپڵ میشن روویداوە. کریگ سمیس، بەڕێوەبەری جێبەجێکاریی ناوەندەکە گوتی: "هێرشکارەکە لە رێکخراوەکەمان نوێ بوو، شەوی شەممە لامان مایەوە و بەنیاز بوو شەوێکی دیکەش بمێنێتەوە، بەڵام کەوتە نێو شەڕێکەوە. شتێک ئەوی زۆر تووڕەکرد و چەقۆی لە گیرفانی دەرهێنا."
بەگوتەی سمیس، لە شەڕەکەدا کارمەندێکی رێکخراوە خێرخوازییەکە بریندار بووە.
ناوەندەکە هەموو شەوێک دەتوانێت میوانداریی 150 بێماڵ بکات و خواردنیشیان پێدەدات، جلوبەرگیشیان بۆ دەشوات.
سمیس گوتی: "جگە لە چەند بێماڵێکی نێو رێکخراوەکە، چەند کەسێکی سەر شەقامیش بریندار بوون. هەموو رووداوەکە لە کامێرای چاودێری دەرکەوتووە و بە پۆلیسی دەدەین."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ