رووداو دیجیتاڵ
لە تۆڕە کۆمەڵایەتییەکان هێرشێکی فراوان کرایە نانسی مێیس، ئەندامی ئەنجوومەنی نوێنەرانی ئەمریکا، ئەوەش دوای ئەوەی بە بێجامەیەکی پەمەیی دەرکەوت و بە درێژایی شەوەکە چەندین پۆستی لە تۆڕە کۆمەڵایەتییەکان کرد.
رۆژی سێشەممە، ئەو ئەندامە کۆمارییە زنجیرەیەک ڤیدیۆی بڵاوکردەوە کە تێیدا بە بێجامەیەکی پەمەیی و سپییەوە بە ئۆتۆمبێل گەشت بۆ واشنتن دی سی دەکات، بۆ ئەوەی دەنگ لەسەر پڕۆژەیاسای باج و خەرجییەکانی ئەمریکا بدات کە ترەمپ خۆی بە "پڕۆژەیاسا گەورە و جوانەکەی" ناوی دەبات.
مێیس گوتی گەشتە ئاسمانییەکانی بۆ دی سی و گەڕانەوەی هەڵوەشاونەتەوە، بۆیە هەوڵی داوە بە رێگەی وشکانیدا بڕوات و لە تۆڕە کۆمەڵایەتییەکان بڵاویبکاتەوە.
لە گرتەیەکی ڤیدیۆییدا کە لە تۆڕی ئێکس بڵاویکردووەتەوە، بە بێجامەیەکەوە دەچێتە فرۆشگەیەک و گوێ لە گۆرانییەک دەگرێت.
هەروەها لە پۆستێکی دیکەیدا دەرکەوتووە کە سێ قووتوو خواردنەوەی وزەبەخشی کڕیوە و سەگەکەیشی لەباوەش کردووە.
یەکێکی دیکە لە پۆستەکانی مێیس نیشانی دەدات کە چووەتە چێشتخانەیەک و نووسیویەتی، "سوپاس بۆ کارکردنی ماندوونەناسانە و گەرمهێشتنەوەی قاوەکە. ئێمە لەبیرمان نەکردووە لە کوێوە هاتووین. ئێستا بەرەو واشنتن دی سی بۆ دەنگدان بە پڕۆژەیاسا گەورە و جوانەکە لە رێگاوەین."
بەڵام بەکارهێنەرانی تۆڕە کۆمەڵایەتییەکان بە گشتی سەرسام نەبوون بەم کارەی مێیس.
کەسێک نووسیویەتی: "گەشتەکەی نانسی مێیس بۆ واشنتن هەڵوەشایەوە، بۆیە ڤانێکی بە شۆفێرەوە بەکرێ گرت، پێجامەکەی لەبەرکرد و کارمەندێکی داماویشی ناچارکرد بە درێژایی رێگەکە وێنەی بگرێت بۆ ئەوەی لە تۆڕە کۆمەڵایەتییەکان ناوبانگ پەیدا بکات. هەمووشی بە پارەی باجدەران. قێزەونە."
یەکێکی دیکە پرسیاری کردووە: "تەنیا 8 کاژێر رێگەیە لە چارڵستنەوە بۆ واشنتن. بۆچی وا نیشانی دەدات کە ئەمە گەشتێکی زۆر گەورە و دوورودرێژە؟"
بەکارهێنەرێکی دیکە نووسیویەتی: "ئەم ژنە چییەتی؟ ئەم ڤیدیۆیانە چین کە تێیدا بە بێجامەیەکەوە دەردەکەوێت؟ کێ تۆڕە کۆمەڵایەتییەکانی بۆ بەڕێوەدەبات؟ ئەمە کارێکی شێتانە و ناشایستەیە بۆ ئەندامێکی کۆنگرێس."
کەسێکی دیکە دەڵێت: "زۆر زیادەڕۆیی دەکات. جلێکی شایستە لەبەر بکە و بگەڕێوە سەر کارەکەت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ