رووبەڕووبوونەوەی پۆلیس و خۆپێشاندەران لە پاریس. وێنە: AFP
رووداو دیجیتاڵ
لە رووداوێكدا کە بە دەگمەن لە وڵاتێكی دیموکراسیی وەک فەرەنسا روودەدات، ماڵی سەرۆکی شارەوانیی ناوچەیەکی دەوروبەری پاریس کرایە ئامانج و بەشێكی سووتێندرا.
روودی ئێلێگیستە، ئەو سەرۆکی شارەوانییەیە کە کرایە ئامانج؛ بەشێک لە لایەنگرانیشی دەورەیان داوە و پاڵپشتیی دەکەن.
کارین، هاووڵاتییەکی فەرەنسییە، دەڵێت: "من لێرەم بۆ دەربڕینی هاوسۆزی بۆ سەرۆکی شارەوانییەکەمان، من دەزانم کە خەڵک تووڕەیە، بەڵام باشتر وایە سەرچاوەی کێشەکە چارەسەر بکرێت و کۆتایی بە تووندوتیژییەکان بهێندرێت."
سەرچاوەی تووندوتیژییەکان کوژرانی نائیلی مێرمنداڵی تەمەن 17 ساڵی بە رەچەڵەک جەزائیرییە کە لە خاڵێکی پشکنینی هاتووچۆ بە چەکی پۆلیس بە پشتبەستن بە یاسای هەموارکراوی ژمارە یەک-435ی ساڵی 2017 کوژرا.
یاساکە ماف دەداتە پۆلیس تەقە لە شۆفێران یان سەرنشینانی ئۆتۆمبیێلەکان بکات، ئەگەر فەرمانی پۆلیسیان رەتکردەوە و پۆلیس لەو کاتە وا بزانێت کە شۆفێرەکە یان سەرنشینان مەترسین بۆ سەر پۆلیس یان خەڵک.
یاساکە قوربانییانی دەستی پۆلیسی زیادکردوون؛ لەو ساڵەوە تاوەکو نیوەی 2023، تەقەکردن 5 هێندە زیادی کردووە.
لە 2022 لانیکەم 39 کەس بە تەقەی پۆلیس کوژراون، 13یان لەنێو ئۆتۆمبێلەکانیاندا لە کاتی پشکنین کوژراون کە بە گوتەی پۆلیس فەرمانی وەستاندنی ئۆتۆمبێل و دابەزینیان رەتکردووەتەوە.
رەشپێستەکان یان خەڵکی ئەفریقای باکوور، 20 جار زیاتر لەوانەی دیکە پرسیاری ناسنامەیان لێدەکرێت و رادەگیرێن.
پارتی فەرمانڕەوای فەرەنسا هۆشداری دەدات لە هەڵکشانی ناڕەزایەتییەکان و دەڵێت، "رێگە نادەین هیچ کەسێک خەنجەر لە پشتی کۆماری فەرەنسامان بدات."
دەستەی مافەکانی مرۆڤی نەتەوە یەکگرتووەکان رەخنە لە "سیستمی پشکنینی ناسنامە"ی فەرەنسا دەگرێت و دەڵێت، دەرگە بۆ پێشێلکارییەکان و مامەڵەی خراپی جەستەیی و زارەکی پۆلیس دەکاتەوە و داواشی لە پاریس کردووە چارەسەری کێشە قووڵەکانی رەگەزپەرستی و جیاکاری بکات کە لەنێو هێزەکانی پۆلیس و هێزە ئەمنییەکاندا کە بەرامبەر کەمینەکان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ