رووداو دیجیتاڵ
لە هێرشێکی چەکداریدا لە بۆرکینا فاسۆ نزیکەی 100 کەس کوژران و ژمارەیەکیش بریندار بوون.
شەوی رابردوو چەند "چەکدارێکی تووندڕەو" لە شارۆچکەی سولهان لە باکووری بۆرکینا فاسۆ لە کیشوەری ئەفریقا، هێرشێکی چەکدارییان ئەنجام دا و دوای هێرشکردنە سەر پێگەیەکی سووپای ئەو وڵاتە، دەستیان کردووە بە تەقەکردن بەنێو خەڵکدا، بەو هۆیەشەوە زیاتر لە 100 کەسی مەدەنی کوژراون و ژمارەیەکی دیکەش لە خەڵک بریندار بوون.
بەرپرسانی شارۆچکەی سولهان ئاماژە بەوە دەکەن، گرووپە چەکدارییەکە یەکەم جار هێرشیان کردووەتە سەر پێگەیەکی سەربازی لە نزیک شارەکە و دواتر دەستیان کردووە بە هێرشکردن بۆ سەر ناوچەی نیشتەجێی خەڵک لەو شارە.
لە هێرشەکەدا چەکدارەکان ئاگریان لە چەند گەڕەکێکی شارۆچەکەکە بەرداوە و دانیشتووانی گەڕەکەکانیش کە هاتوونەتە دەرەوە بەر دەستڕێژی گولـلە دراون، زۆربەی کوژراوەکانیش ژن و منداڵن.
حکومەتی مالی رایگەیاندووە ئەوانەی هێرشەکەیان ئەنجامداوە "گرووپێکی تیرۆریستین"، بەڵام ئاماژەی بە ناوی گرووپەکە نەداوە.
لە ساڵی 2015وە هێرشی چەکداری و خۆکوژی لەو وڵاتە دەستیان پێکردووە کە زۆربەیان سەر بە گرووپەکانی ئەلقاعیدە و داعشن و ناوبەناو هێرشی تووندڕەویی ئەنجام دەدەن.
هەر بەهۆی ئەو هێرشانەشەوە لە ناوچە جیاوازەکانی ئەو وڵاتە، زیاتر لە یەک ملیۆن کەس ئاوارە بوون، ئەوەش خوێناویترین هێرشی چەکدارییە لەو وڵاتە لە 2015ـەوە روویدابێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ