رووداو دیجیتاڵ
دوای چەند مانگێک لە ئاڵۆزی و بەخشینەوەی تۆمەت و هەڕەشە، دۆناڵد ترەمپ، سەرۆکی ئەمریکا و گوستاڤۆ پێترۆ، سەرۆکی کۆڵۆمبیا یەکەم پەیوەندیی تەلەفۆنییان ئەنجامدا. ترەمپ دەڵێت "لە داهاتوویەکی نزیکدا" پێترۆ لە کۆشکی سپی دەبینێت.
وەزارەتی دەرەوەی کۆڵۆمبیا رایگەیاند، یەکەم پەیوەندیی تەلەفۆنی لەنێوان هەردوو سەرۆکدا ئەنجامدراوە، ئەمەش یەکەم گفتوگۆی فەرمییانە لە دوای گەڕانەوەی ترەمپ بۆ کۆشکی سپی لە ساڵی 2025.
دۆناڵد ترەمپ لە هەژماری خۆی لە تروس سۆشیال ئاماژەی بەوە کرد، باس لە جیاوازییەکانی نێوانیان کردووە، بەتایبەت پرسی بازرگانیکردن بە مادە هۆشبەرەکان. ترەمپ نووسیویەتی: "دەستخۆشی لە پەیوەندییەکەی و تۆنی قسەکردنی دەکەم، چاوەڕێی بینینیم لە کۆشکی سپی."
رۆژی یەکشەممە، 4ـی کانوونی دووەم، ترەمپ لەناو فڕۆکەی سەرۆکایەتیدا، هەڕەشەی تووندی لە کۆڵۆمبیا کرد. دوای ئەوەی هێزەکانی ئەمریکا هێرشێکی کتوپڕیان کردە سەر کاراکاس و نیکۆلاس مادۆرۆیان لە دەسەڵات دوورخستەوە، ترەمپ گوتی، "ئەگەری هێرشی سەربازی بۆ سەر کۆڵۆمبیاش لەسەر مێزە".
ترەمپ پێشتر بەبێ خستنەڕووی بەڵگە، پێترۆ و خێزانەکەی بە تێوەگلان لە بازرگانیی کۆکاین تۆمەتبار کردبوو و سزای دارایی بەسەردا سەپاندبوون.
لای خۆیەوە، گوستاڤۆ پێترۆ لەبەردەم لایەنگرانی لە گۆڕەپانی "بۆلیڤار" لە بۆگۆتای پایتەختی وڵاتەکەی رایگەیاند، پلان بۆ سەردانی واشنتن دادەنێت بەبێ ئەوەی بەدیاریکراوی ئاماژە بە کاتی سەردانەکەی بکات.
سەرۆکی کۆڵۆمبیا گوتی: "بە نیازبووم گوتارێکی زۆر تووند پێشکەش بکەم، بەڵام دوای پەیوەندییە تەلەفۆنییەکە کە کاژێرێکی خایاند، گوتارەکەم گۆڕی."
سەرۆکی کۆڵۆمبیا ئاشکرای کرد، داوای لە ترەمپ کردووە پەیوەندییە راستەوخۆکان لەنێوان وەزارەتی دەرەوە و سەرۆکایەتیی هەردوو وڵاتدا دەستپێبکاتەوە و گوتیشی: "ئەگەر دیالۆگ نەبێت، جەنگ دەبێت.. ئەوان ترەمپیان رازی کردبوو کە من پاشای کۆکاینم، بەڵام ئەو گەمژە نییە."
هاوکات پێترۆ، ئاماژەی بەوەش کرد، پەیوەندیی بە دێلسی رۆدریگز، سەرۆکی کاتیی ڤەنزوێلاوە کردووە و داوای گفتوگۆیەکی گشتگیری کردووە بۆ سەقامگیری ئەو وڵاتە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ