جیهان
چەند پۆلیسێکی هایتی لێکۆڵینەوە لە چۆنییەتی کوژرانی سەرۆکی وڵاتەکە دەکەن. وێنە؛ AFP / VALERIE BAERISWYL
رووداو دیجیتاڵ
پۆلیسی هایتی چوار لەو هێرشکارانەی کوشت کە دوێنێ جۆڤێنیل مۆئیس سەرۆکی وڵاتەکەیان لە ماڵەکەی خۆی کوشت و خانمی یەکەمی وڵاتەکەشیان بریندارکرد .
رووداوی کوشتنی سەرۆکی هایتی کاردانەوەی نێودەوڵەتی لێکەوتەوە و هەژارترین وڵاتی سەر دەریای کاریبی رووبەڕووی قەیرانێكی دیکە کردەوە، لەکاتێکدا پێشتر بە دەستی چەندین قەیرانەوە دەیناڵاند.
پێش کوشتنی سەرۆکی هایتی خەڵک خۆپێشاندانیان دەکرد و تووندوتیژیش هەبوو بەهۆی ئەوەی سەرۆکی وڵاتەکە هەوڵی فراوانکردنی دەسەڵاتی دەدا.
لیۆن چارلس، بەڕێوەبەری پۆلیسی هایتی رایگەیاند: "هێرشکارەکان لە ماڵێکدا گەمارۆدران و چواریان کوژراون و دووی دیکەش دەستگیرکراون، سێ ئەفسەری پۆلیسیش کە وەکو بارمتە لای هێرشکارەکان بوو رزگارکراون."
هەروەها کلۆد جۆزێف، سەرۆکوەزیرانی کاربەرێکەری هایتی رایگەیاند: "قەیرانی وڵاتەکە درێژەی کێشا و پێویستە لەمەودوا بۆ باشترکردنی دۆخەکە یەکگرتووبن، دەشڵێ :"کوشتنی سەرۆکی هایتی بێ سزا تێناپەڕێت ."
هایتی دانیشتووانەکەی 11 ملیۆن کەس زیاترە، بەهۆی هەژاری و بێکارییەوە دەناڵێنێت و قەیرانێکی زۆر یەخەی گرتووە، وڵاتەکە لە ماوەی رابردوودا رووبەڕووی کودەتا و کێشەی زۆر بووەتەوە، لە 2010 شدا بوومەلەرزەیەک بە گوڕی 7پلەی رێختەر وڵاتەکەی هەژاند و زیاتر لە 250 هەزار کەس بەهۆیەوە گیانیان لەدەستدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ