رووداو دیجیتاڵ
ئۆکراینا بە نیازە کۆمەڵێک رۆبۆت بنێرێتە بەرەکانی پێشەوەی جەنگ، تاوەکو ئەرکە قورسەکانی وەک نزیکبوونەوە لە بەرەی رووسیا و گەڕان بەدوای مینیان پێبسپێرێت.
رۆژی پێنجشەممە، 08-08-2024، لە پێشانگەیەکی ئۆکراینا جۆرە سەگە رۆبۆتێک نمایشکرا کە ناوی (باد 1)ـە. رۆبۆتەکە کە لەسەر شێوەی سەگ دروستکراوە، دەتوانێت بە وەرگرتنی فەرمان هەستێتەوە، بکەوێتە سەر ئەژنۆ، دابنیشێت و رابکات.
کۆمپانیای دروستکاری رۆبۆتەکە رایگەیاند: "سەگە رۆبۆتەکە وریا و بزێوە، بەمزووانە دەبێتە هاوپەیمانێکی گرنگی سوپا لە بەرەی پێشەوەی جەنگ و وەڵامی داگیرکاریی رووسیا دەداتەوە."
رۆبۆتەکان بچووکن، بۆیە دەستنیشانکردنیان لە راداری رووسیا قورس دەبێت. هەروەها ئامێری گەرمبینیان لەسەرە و دەتوانن خەندەقەکانی رووسیا دەستنیشان بکەن و هەست بە سەربازەکانیان بکەن.
کارپێکەری رۆبۆتەکە ناوی لەخۆی ناوە (یوری) و گوتی: "ئێمە زۆرجار تیمی سەربازانی چاودێری دەنێرینە بەرەکانی جەنگ، بەڵام دووچاری مەترسی زۆر دەبنەوە. ئەم سەگە رۆبۆتە مەترسییەکان سنووردار دەکات و توانای ئۆپەراسیۆنەکان باشتر دەکات."
بە گوتەی یوری، سەگە رۆبۆتەکە پاترییەکی لەسەرە کە دەتوانێت بۆ ماوەی دوو کاژێر بە کارایی بیهێڵێتەوە. رۆبۆتەکە بە کەڵکی دەستنیشانکردنی مین و بۆمبی هەیە و دەتوانێت 7 کیلۆگرام کەلوپەل هەڵبگرێت.
یوری گوتیشی: "نازانم چەند سەگە رۆبۆت دەنێرینە بەرەکانی جەنگ، بەڵام دەزانم کە کاریگەرییەکی زۆریان بۆ ئۆپەراسیۆنەکان و سەلامەتیی سەربازەکان دەبێت."
کۆمپانیاکە هەروەها وەشانێکی پێشکەوتووتری دیکەی رۆبۆتەکەی دروستکردووە و ناوی لێناوە (باد 2)، بەڵام بەهۆی رێکاری ئەمنی پیشاننەدرا.
پرسیاری ئەوە لە یوری کرا چی روودەدات ئەگەر بکەونە دەست سەربازانی رووسیا؟ یوری گوتی: "سەگەکە خۆکارانە دەتوانێت هەموو داتاکانی بسڕێتەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ