پێترا لەنێو ئۆتۆمبێلەکەی
رووداو دیجیتاڵ
پێترا خەڵکی ئەڵمانیایە، سێ ساڵ و نیوە دەستی بە گەڕان بە وڵاتانی جیهاندا کردووە، لە مانگی 12ی 2023 چووەتە ئێران و بەنیازبوو گەشتێک بە رۆژهەڵاتی کوردستاندا بکات و دواتر بچێتە هیندستان، بەڵام لە 22ی ئەو مانگەدا لەنزیک مهاباد ماوەتەوە، بەهۆی ئەوەی ئۆتۆمبێلەکەی تێکچووە.
پێترا، گەشتیاری ئەڵمانی دەڵێت، "ئۆتۆمبێلەکەم تایبەتە و پارچەی یەدەگی لە ئێران دەست ناکەوێت. مەکینەی ئۆتۆمبێلەکەم تێکچووە و پێویستە لە ئەڵمانیاوە بنێردرێت. ئۆتۆمبێلەکە کۆنە و زۆر پێشکەوتوو نییە. 46 ساڵ پێش ئێستا دروستکراوە. ئۆتۆمبێلەکەم ئەو ماتۆڕەشی تێدایە و هەمیشە لەگەڵ خۆم دەیگێڕم. هەرکات ئۆتۆمبێلەکەم تێکبچێت، دەتوانم بەو ماتۆڕە بچم و یارمەتی بهێنم. ماتۆڕەکە هاوکارێکی باشی ژیانی منە."
ئۆتۆمبێلە تایبەتەکەی پێترا لەسەر رێگەی بورهان و لەنزیک مهاباد تێکچووە؛ چەند وەستاکاری بۆکان و مهاباد چوونەتە سەر ئۆتۆمبێلەکە، بەڵام نەیانتوانیوە چاکی بکەنەوە. پێترا ئۆتۆمبێلەکەی گواستووەتەوە بۆ گوندی زگدڕاوی مهاباد. دانیشتووانی گوندەکە و خەڵکێکی زۆر لەنێو شاری مهاباد و گوندەکانی دەوروبەریەوە رۆژانە سەردانی پێترا دەکەن، خواردنی بۆ دەبەن و بانگهێشتی دەکەن سەردانی ماڵەکەیان بکات.
ئەو گەشتیارە ئەڵمانییە ئاماژە بەوە دەکات، "هیچ شتێکم بۆ خۆم نەکڕیوە. بەردەوام بانگهێشت دەکرێم بۆ نانخواردن. خەڵکێکی زۆر سەردانم دەکەن و لەگەڵ خۆیان دەمبەن بۆ گەشت و سەیران و خواردنم پێ دەدەن. دەچمە نێو خێزانەکانیان و تەنانەت لەگەڵیاندا چووم بۆ زەماوەندیش. زۆر خۆش بوو."
ئۆتۆمبێلەکەی پێترا شوێنی مانەوەی تێدایە، هەر لەنێو ئۆتۆمبێلەکەی خواردن دەخوات، کتێب دەخوێنێتەوە و پشوو دەدات. ئەگەریش نەچێتە ماڵی خەڵک، رۆژانە بۆ هەر سێ ژەمەکە، خەڵک خواردنی بۆ دەبەن، بەتایبەت خواردنی خۆماڵی.
پێترا دەڵێت، سەرمای پێخۆش نییە و پلانی دانابوو لەم وەرزەی ساڵدا لە شوێنێکی گەرم بێت، بەڵام چارەنووس تووشی ناوچە شاخاوییەکانی کوردستانی کردووە. ئەو دەڵێت، دوای گەڕانەوە بەسەرهاتی ئەو سەردانەی و میوانگربوونی خەڵکی کوردستان دەکاتە سەفەرنامەیەک و بڵاوی دەکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ