ژمارەیەک بووکی دەریا
رووداو دیجیتاڵ
کەناراوی هەرێمی ئەراگوا لە ڤەنزوێلای ئەمریکای لاتین، چەند رۆژێکە سەدان بووکی دەریای رەنگ جیاواز روویان تێکردووە و نازانرێت بە تەواوی هۆکارەکەی چییە.
جۆکسمەر سکۆت، پرۆفیسۆر و توێژەر دەڵێت، "ئەمە رووداوێکی دەگمەنە و زۆر ناسرووشتییە. لە ساڵانی رابردوودا تەنیا چەند دانەیەکمان دەبینی، بەڵام ئەم ساڵ ژمارەیان زۆر زیادیکردووە و لە سەرووی پێشبینیی ئێمەوەن."
جگە لەو جوانییەی بە دەریاکەیان بەخشیوە، بوونەتە هۆی سەرنجڕاکێشانی گەشتیارێکی زۆر، کە پارە دەدەن بۆئەوەی لە نزیکەوە بیانبینن و دەستیان لێدەن.
بەڵام کێشەیان بۆ ماسیگرەکانی ئەو ناوچەیەش دروستکردووە و بازاڕیانی کز کردووە. دۆگڵاس مارتینێز، بازرگان و ماسیگر دەڵێت، "دۆخێکی سەختە و لەڕووی ماسیگرتنەوە کاریگەریمان لێدەکات، بەتایبەتی ئەوانەی لە کەناراوەکان راوە ماسی دەکەن و تۆڕی راوکردن بەکاردەهێنن، بووکێکی زۆری دەریا دەکەونە نێو تۆڕەکە و کەس ناتوانێت ماسی بگرێت."
وەزارەتی ژینگەی ڤەنزوێلا رایگەیاندووە، چوونی بووکی دەریا بەو ژمارە زۆرە بۆ ئەو کەناراوە بۆ گۆڕانی کەشوهەوا، کەمبوونەوەی ئاژەڵە راوکەرەکانی وەکو کیسەڵ و قرش و پیسبوونی ئاو دەگەڕێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ