رووداو دیجیتاڵ
لە کۆستاریکا پێنج گەشتیاری ئیسرائیلی لەلایەن گرووپێکەوە قۆڵبەست دەکرێن، رووتدەکرێنەوە و دەیان هەزار دۆلاریان لێ دەدزرێت. وەزارەتی دەرەوەی ئیسرائیل دەڵێت، ئاگاداری رووداوەکەن و لێکۆڵینەوە دەکەن.
رۆژی پێنجشەممە، 08-08-2024، میدیای ئیسرائیل بڵاویکردەوە، "پێنج گەشتیاری ئیسرائیلی لە کۆستاریکا لەلایەن گرووپێکەوە رووتکراونەتەوە، بەستراونەتەوە و دزییان لێکراوە."
بەگوێرەی میدیای ئیسرائیل، پێنج ئیسرائیلییەکە لە ناوچەی گەشتیاریی سانتا تێرێز لە رۆژئاوای کۆستاریکا ڤێلایەکیان بەکرێ گرتووە و چەند رۆژێک لەو ناوچەیە ماونەتەوە. گرووپەکە کە هێشتا زانیاری لەسەریان بڵاونەکراوەتەوە، چاودێریی ئیسرائیلییەکانیان کردووە و زانیویانە یەکێکیان دەیان هەزار دۆلاری پێبووە.
دوای ئەوەی گرووپەکە هەڵدەکوتنە سەر گەشتیارەکان، دەست و قاچەکانیان دەبەستنەوە، جلەکانیان لەبەر دادەکەنن، لەسەر سک پاڵیان دەخەن و پارە و کەلوپەلە گرانبەهاکانیان دەدزن.
لە کامێرای چاودێریی ئەو شوێنە دەردەکەوێت، پێنج گەشتیارەکە بە تەنیا شۆرتێکەوە لە نێو ژوورێکی ڤێللاکە لەسەر سک راکشاون و خاولییەک بەسەر سەریاندا دراوە.
وەزارەتی دەرەوەی ئیسرائیل رایگەیاند، ئاگاداری هەواڵەکەن و خەریکی لێکۆڵینەوەن. بەهۆی جەنگی 10 مانگەی ئیسرائیل و گرووپە چەکدارەکانی فەلەستینەوە، ئەنجوومەنی ئاسایشی نیشتمانیی ئیسرائیل داوای لە هاووڵاتییەکانی کردووە گەشت بۆ 40 وڵات نەکەن، بەڵام کۆستاریکا لەو لیستەدا نییە.
کۆنسوڵخانەی ئیسرائیل لە کۆستاریکا لە رووداوەکە ئاگادارکراوەتەوە و ئەوانیش پەیوەندییان بە گەشتیارەکان و کەسوکارەکانیان کردووە.
تائێستا دیار نییە ئەو گرووپە کێن و سەر بە چ لایەنێکن، دیاریش نییە ئاخۆ ئەم هێرشە پەیوەندی بە جەنگی غەززەوە هەیە یان نا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ