جیهان
جۆ بایدن، سەرۆکی ئەمریکا و کامالا هاریسی جێگری کە هاوکات بەربژێری دیموکراتەکانە بۆ هەڵبژاردنی سەرۆکایەتیی وڵاتەکە. وێنە: Anna Moneymaker/Getty Images
رووداو دیجیتاڵ
سەرۆکی ئەمریکا دڵی بە ئاستی جێگرەکەی لە دیبەیتی سەرۆکایەتی خۆشە و دەڵێت، "سەلماندی کە ئەو باشترین بژاردەیە."
رۆژی چوارشەممە 11-09-2024 جۆ بایدن، سەرۆکی ئەمریکا لە تۆڕی کۆمەڵایەتیی ئێکس رایگەیاند، "ئەمریکا ئەمشەو ئەو سەرکردەیەی بینی کە من بۆ ماوەی سێ ساڵ و نیو کارم لەگەڵ کردووە. هاریس زۆر لە ترەمپ باشتر بوو."
ئەمڕۆ دیبەیتی سەرۆکایەتیی ئەمریکا لەنێوان کامالا هاریس و دۆناڵد ترەمپ بەڕێوەچوو. لەوبارەوە، بایدن نووسیویەتی، "جێگری سەرۆکی ئەمریکا سەلماندی کە ئەو باشترین بژاردەیە بۆئەوەی سەرکردایەتیی نەتەوەکەمان بکات. ئێمە ناگەڕێینە دواوە."
لە دیبەیتە 90 خولەکییەکە، هاریسی دیموکرات و ترەمپی کۆماری گفتوگۆی چەندین مژاریان کرد، لەوانەش ئابووری، کۆچبەران، جەنگی غەززە و ئۆکراینا، لەباربردنی منداڵ و چەندین پرسی دیکە.
بەگوێرەی راپرسییەکی نافەرمی، دوای دیبەیتەکەیان، هاریس 45%ی دەنگەکان و ترەمپیش 39%ی بەدەستهێناوە؛ هەروەها 22%ی بینەران رایانگەیاندووە کە هیچکامیان نەیانتوانیوە پلانێکی باش بۆ چارەسەرکردنی کێشەکانی وڵات بخەنەڕوو.
دوای تەواوبوونی دیبەیتەکە، تیمی بانگەشەی هاریس داوای دیبەتێکی دیکەیان کرد کە لە مانگی تشرینی یەکەم و پێش بەڕێوەچوونی هەڵبژاردنی سەرۆکایەتیی ئەمریکا بکرێت.
جێن ئۆمەیڵی دیلۆن، سەرۆکی تیمی بانگەشەی هاریس گوتی، "لەنێوان چوونە پێش لەگەڵ هاریس و گەڕانەوە دواوە لەگەڵ ترەمپ، پێویستە خەڵکی ئەمریکا بزانن چی هەڵدەبژێرن؟ ئەمریکییەکان ئەمشەو ئەوەیان بینی و پێویستە دیبەیتی دووەمیش بکرێت. کامالا هاریس ئامادەیە، ئەی دۆناڵد ترەمپ."
دۆناڵد ترەمپ دوای دیبەیتەکە رایگەیاند، "ئەوان دۆڕاون، بۆیە داوای دیبەیتێکی دیکە دەکەین."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ