هەڵەیەک روویدا! دووبارە هەوڵبدە
دۆخی ژنانی دووگیان لە غەززە
رووداو دیجیتاڵ
نەخۆشخانە و قوتابخانەکان بوونەتە شوێنی پاراستن و ژیانی بەشێک لە خێزانەکانی غەززە، سەرباری ئەوەی هەندێک جار ئەو شوێنانەش لەلایەن ئیسرائیلەوە بە ئامانج دەگیرێن ئێستا رووبەڕووی قەیرانی ئاوی پاک و پێداویستی و چاودێری تەندروستی بوونەتەوە.
ویسام مەسری، ژنێکی کەرتی غەززەیە، کە بەهۆی مەترسی بۆردوومانەکانی ئیسرائیلەوە منداڵەکەی لە دۆخی سەختدا لەدایک بووە و دەڵێت، "نەشتەرگەری منداڵبوونم هەبوو و کچەکەم لەدایکبوو. دوای نەشتەرگەرییەکە بەهۆش هاتمەوە و پێیان گوتم پێویستە دەستبەجێ نەخۆشخانەکە جێبهێڵم."
ویسام نەسری دوای لە دایکبوونی منداڵەکەی، پەنای بۆ قوتابخانەیەک برد، لەوێش بێبەشە لە خزمەتگوزارییە سەرەتاییەکانی وەکو ئاوی پاک و پێداویستی و چاودێری تەندروستی. تاوەکو ئێستا بۆردوومانەکانی ئیسرائیلیش بۆ سەر نەخۆشخانەکانی کەرتی غەززە، بەتایبەت نەخۆشخانەی شیفا لەزیادبووندان.
می کەیلە، وەزیری تەندروستیی دەسەڵاتی فەڵەستین لەوبارەیەوە رایگەیاند، "ئەوەی شەوی رابردوو لە نەخۆشخانەی شیفا و نەخۆشخانەکانی دیکەی غەززەدا روویدا، بە تایبەت نەخۆشخانەی شیفا، ترسناکە و ئەمە هێرشی ئاسمانی بوو بۆ سەر نهۆمی چوارەم کە یەکەی منداڵبوونی لێیە."
بەهۆی بۆردوومانەکانی ئیسرائیلیشەوە، زیان بەر سەرچاوەی کارەبای نەخۆشخانەی شیفا کەوتووە، بەهۆی نەمان و کەمبوونەوەی کارەبای نەخۆشخانەکەشەوە، دوو کۆرپە گیانیان لەدەستداوە و ژیانی 37ـی دیکەشیان لە مەترسیدایە.
بە گوێرەی ئاماری وەزارەتی تەندروستیی کەرتی غەززە، بەهۆی بۆردوومانی ئیسرائیلەوە 18 نەخۆشخانە لەکارکردن وەستاون.
هاوکات، نزیکەی 185 هەزار ژنی دووگیان و تازە منداڵ بووی کەرتەکەش لە خزمەتگوزاری تایبەت بە لەدایکبوون و منداڵان بێبەش بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ