هەڵەیەک روویدا! دووبارە هەوڵبدە
رووداو دیجیتاڵ
سەرۆکی هەڵبژێردراوی ئەمریکا دەڵێت، بەڕێوەبەری پێشووی جێبەجێکردنی یاسای کۆچبەران و پاسەوانی سنووری ئەمریکا دەکاتە بەرپرسی کاروباری سنوورەکان. کەسی دیاریکراویش دەڵێت، "هەر کەسێک بە نایاسایی هاتووەتە نێو ئەمریکا، دەبێت نیگەران بێت و بزانێت دەکرێت هەنگاوی بەرامبەر بگیرێتەبەر."
دۆناڵد ترەمپ، سەرۆکی هەڵبژێردراوی ئەمریکا لە تۆڕی کۆمەڵایەتیی تروس بڵاویکردەوە، "دڵخۆشم بە راگەیاندنی ئەوەی کە تۆم هۆمان، بەڕێوەبەری (کاتیی) پێشووی جێبەجێکردنی یاسای کۆچبەران و پاسەوانی سنوور وەکو بەرپرسی سنوورەکانی ئەمریکا بەشێک دەبێت لە ئیدارەی ترەمپ."
ترەمپ ئاماژەی بەوەش کرد، هۆمان بەرپرس دەبێت لە ئاسایشی سنوورەکانی باشوور، باکوور، ئاسمانی و دەریایی ئەمریکا. جەخت لەوەش دەکاتەوە، هۆمان بەرپرسی دیپۆرتکردنەوەی کۆچبەرانیش دەبێت.
ساڵانی 2017 و 2018 هۆمان بەڕێوەبەری (کاتیی) پێشووی جێبەجێکردنی یاسای کۆچبەران و پاسەوانی سنوور بوو.
هۆمان بە کەسێکی تووندی دژی کۆچبەر ناسراوە، دڵخۆشیی خۆی بە هەڵبژاردنی لەلایەن دۆناڵد ترەمپەوە دەربڕی و بە میدیای وڵاتەکەی گوت، "شانازی دەکەم."
رۆژانی 8 بۆ 10ی تەممووزی ئەم ساڵ، لە کۆنفرانسێکی کۆمارییەکان هۆمان رایگەیاند، "هەر کەسێک بە نایاسایی لێرە بێت، دەبێت نیگەران بێت و بزانێت دەکرێت هەنگاوی بەرامبەر بگیرێتەبەر."
هۆمان گوتی، "ئەمەتان لەبیربێت؛ کانوونی دووەمی داهاتوو ترەمپ دەگەڕێتەوە و منیش پاڵپشتیکاری دەبم و گەورەترین پرۆسەی دیپۆرتکردنەوە (ی کۆچبەران) لە مێژووی ئەمریکا بەڕێوەدەبەم."
پرسی کۆچبەران و دیپۆرتکردنەوەیان یەکێک بوو لە گرنگترین بابەتەکانی بانگەشەی هەڵبژاردنی دۆناڵد ترەمپ بۆ سەرۆکایەتی ئەمریکا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ