هەڵەیەک روویدا! دووبارە هەوڵبدە
رووداو دیجیتاڵ
سەرۆکی پەرلەمانی ئەورووپا لە کاردانەوەی "سەرکوتکردن و کوشتن"ـی خۆپێشاندەران، بڕیاریدا سەردانی دیپلۆماتکار و بەرپرسانی ئێران بۆ تەواوی بنکە و بارەگاکانی پەرلەمانەکە قەدەخە بکات.
رۆژی دووشەممە، 12-01-2026، رۆبێرتا مێتسۆلا، سەرۆکی پەرلەمانی ئەورووپا لە پۆستێکدا لە تۆڕی کۆمەڵایەتیی ئێکس (تویتەری پێشوو) رایگەیاند: "لە کاتێکدا گەلی ئازای ئێران بەردەوامن لە داکۆکیکردن لە ماف و ئازادییەکانیان، ئەمڕۆ بڕیارم دا هاتنی هەموو ستافی دیپلۆماسی و هەر نوێنەرێکی دیکەی کۆماری ئیسلامیی ئێران بۆ نێو هەموو بنکە و بارەگاکانی پەرلەمانی ئەورووپا قەدەخە بکەم."
سەرۆکی پەرلەمانی ئەورووپا هۆکاری بڕیارەکەی روونکردووەتەوە و دەڵێت: "ئەم دامەزراوەیە هاوکار نابێت لە شەرعییەتدان بەم رژێمەی کە لە رێگەی ئەشکەنجە، سەرکوتکردن و کوشتنەوە خۆی راگرتووە."
پێشتریش مێتسۆلا لەبارەی دۆخی ئێران رایگەیاندبوو، "پێویستە وڵاتانی ئەورووپا کار بۆ خواستەکانی خۆپێشاندەران بکەن." داوای کردبوو لەو چوارچێوەیەدا "سوپای پاسدارانی ئێران بخەنە لیستی تیرۆر و سزاش بەسەر هەموو ئەوانەدا بسەپێنن کە هێرشدەکەنە سەر خۆپێشاندەران و دەیانکوژن."
هەڵوێستەکەی یەکێتیی ئەورووپا لە کاتێکدایە خۆپێشاندان و ناڕەزایەتییەکان لە ئیران پێی ناوەتە 16یەمین رۆژەوە و ماوەی چوار رۆژیشە هێڵی ئینتەرنێت لەسەرانسەری وڵات بڕاوە.
بەپێی ئاماری رێکخراوی مافی مرۆڤی ئێران (هێرانا)، لە سەرەتای خۆپێشاندانەکانەوە 544 خۆپێشاندەر کوژراون و زیاتر لە 10 هەزار و 600 کەس دەستبەسەر کراون.
حکومەتی ئێران کوژرانی 111 کارمەندی هێزە ئەمنییەکانی پشتڕاست کردووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ