وەزارەتی دەرەوەی ئەمریکا بۆ رووداو: پێشبینی دەکەین حکومەتی عێراق دژی گرووپە میلیشیاکان هەنگاو بنێت

 

رۆژی چوارشەممە، 13-12-2023، ماتیۆ میللەر، گوتەبێژی وەزارەتی دەرەوەی ئەمریکا، لەبارەی هێرشی گرووپە چەکدارەکانی عێراق بۆ سەر هێزەکانیان بە رووداوی راگەیاند، ئەگەر حکومەتی عێراق، ئەم هێرشانە رانەگرن، ئەوان بۆ پاراستنی سەرباز و کارمەندەکانیان بەبێ دوودڵی وەڵامیان بۆ ئەو هێرشانە دەبێت. ئەو دەشڵێت، دوایین هێرشی ئەو گرووپانە بۆ سەر باڵیۆزخانەی وڵاتەکەیان بووە لە بەغدا.

 

میللەر لە وەڵامی پرسیاری دیار کوردە، بەڕێوەبەری نووسینگەی رووداو لە واشنتن، رایگەیاند، "لەبارەی هێرشی گرووپە چەکدارەکان، وەزیری دەرەوە ژمارەیەک گفتوگۆی لەگەڵ محەممەد شیاع سوودانی، سەرۆکوەزیرانی عێراق هەبووە. ئێمە پێشبینیی دەکەین کە حکومەتی عێراق هەنگاوی پێویست بنێت و لەو خاڵە لەگەڵ حکومەتی عێراق زۆر روون بووین."

 

هەر ئەمڕۆ (چوارشەممە) ماتیۆ میللەر گوتی، ئەنتۆنی بلینکن، وەزیری دەرەوە سەرکۆنەی هێرشکردنە سەر باڵیۆزخانەی ئەمریکا و هێزەکانی هاوپەیمانانی کردووە لە عێراق و سووریا لەلایەن گرووپە چەکدارەکانەوە. 

 

بەگوێرەی راگەیێندراوەکە، ئەنتۆنی بلینکن لە پەیوەندییەکی تەلەفۆنییدا دەستخۆشی لە سوودانی کردووە لە بەرامبەر سەرکۆنەکردنی ئەو هێرشانە و ناوهێنانیان وەک "کاری تیرۆریستی،" هەروەها دەستخۆشی لە پابەندبوونی حکومەتی عێراق کردووە بۆ لێکۆڵینەوە و بەسزاگەیاندنی ئەوانەی ئەو هێرشانەیان کردووە.

 

ئەمە جاری دووەمە لەم هەفتەیەدا بەرپرسانی باڵای ئەمریکا لەگەڵ سوودانی لەبارەی هێرشەکانەوە قسە دەکەن، رۆژی شەممە 9ی 12 لۆید ئۆستن، وەزیری بەرگریی ئەمریکا بە سوودانی راگەیاند، کەتیبەکانی حیزبوڵڵا و نوجەبا دوو رێکخراوی ''تیرۆریستین'' و بەرپرسن لەو هێرشانەی هاوپەیمانی نێودەوڵەتی دژی داعش دەکەنە ئامانج، ئەمریکاش مافی تەواوی هەیە بۆ ئەوە وەڵامێکی تووندی ئەو گرووپانە بداتەوە.

 

بەگوتەی بەرپرسانی ئەمریکا لە 17ـی تشرینی یەکەمەوە 77 جار هێزەکانیان لە عێراق و سووریا کراونەتە ئامانج، لەبەرامبەر ئەو هێرشانە، ئەمریکاش لە رۆژئاوا و نێوەڕاستی عێراق پێگەی ئەو گرووپانەی بۆردوومانکرد و بووە هۆی کوژرانی 15 چەکدار کە ئەمریکا بە ئەنجامدەری هێرشەکانیان دەزانێت.

 

 

 

ماتیۆ میللەر: من، دەڵێم کە وەزیری دەرەوە چەند گفتوگۆیەکی هەبووە، یەکێک لەوان چاوپێکەوتنێکی رووبەڕوو بوو لە بەغدا لەگەڵ سەرۆکوەزیران سوودانی و لەسەر دوو خاڵ زۆر روون بوو. یەکەم: ئێمە پێشبینی دەکەین کە حکومەتی عێراق لە دژی ئەو گرووپانە هەنگاو بنێت کە چەند هێرشێکیان کردووەتە سەر هێزەکانی ئەمریکا کە نوێترینیان ‌هێرش بوو بۆ سەر باڵیۆزخانەی ئەمریکا لە عێراق، ئەگەر حکومەت هیچ کردەوەیەکی نەبێت. ئێمە بێ دوو دڵی ئەو هەنگاوانەی کە پێویستن جێبەجێیان دەکەین بۆ بەرگریکردن لە سەرباز و کارمەندانمان لە عێراق.

 

 

 ماتیۆ میلەر: دووبارە من باسی گفتوگۆ دیپلۆماسییە تایبەتەکانمان ناکەم، جگە لەوەی کە ئێمە بە روونی رامانگەیاندووە، کە پێشبینی دەکەین عێراق چەند هەنگاوێکی کردەیی بنێت بۆ راگرتنی ئەو گرووپانە.