هەڵەیەک روویدا! دووبارە هەوڵبدە
رووداو دیجیتاڵ
لیژنەی پاراستنی رۆژنامەڤانان (CPJ) رایگەیاند، پار 99 رۆژنامەڤان کوژراون کە 72یان لە جەنگی ئیسرائیل و حەماسدا بووە.
رۆژی پێنجشەممە، 15ی شوباتی 2024، لیژنەی پاراستنی رۆژنامەڤانان بڵاویکردەوە، پار 99 رۆژنامەڤان کوژراون و بەراورد بە پێرار کوژرانی رۆژنامەڤانان 44٪ زیادی کردووە. هەروەها دەشڵێت، ئەگەر جەنگی ئیسرائیل و حەماس نەبووایە کوژرانی رۆژنامەڤانان لە 2023دا بەراورد بە ساڵی پێشتر کەمتر دەبووەوە.
لیژنەی پاراستنی رۆژنامەڤانان ئاماژەی بەوەش کرد، ئەو رۆژنامەڤانانەی لە سێ مانگی سەرەتای جەنگی ئیسرائیل و حەماسدا کوژراون زیاترە لە ژمارەی ئەو رۆژنامەڤانانەی لە هەر وڵاتێکدا لە ماوەی ساڵێکدا کوژرابن. هەروەها، لەو 72 رۆژنامەڤانەی لە جەنگی ئیسرائیل و حەماسدا کوژراون تەنیا سێیان لوبنانی و دووانیشیان ئیسرائیلی بوون.
لیژنەی پاراستنی رۆژنامەڤانان رێکخراوێکی سەربەخۆیە و بارەگاکەی لە نیویۆرکە. بە گوتەی خۆیان، ئامانجیان پاڵپشتیکردنی ئازادیی رۆژنامەڤانی و بەرگریکردنە لە مافەکانی رۆژنامەڤانان. ساڵی 1980 رێکخراوەکە دامەزراوە و ساڵانەش راپۆرتی خۆی لەبارەی رۆژنامەڤانانەوە بڵاودەکاتەوە.
لەبارەی زۆری ژمارەی کوژرانی رۆژنامەڤانە فەڵەستینییەکانەوە جۆدی گینسبێرگ، بەڕێوبەری جێبەجێکاری لیژنەی پاراستنی رۆژنامەڤانان رایگەیاند، "زۆری ژمارەی کوژراوانی رۆژنامەڤانە فەڵەستینیەکان کاریگەری درێژخایەنی لەسەر ناوچەکە و دەرەوەی ناوچەکەش دەبێت، هەر رۆژنامەڤانێکیش کە دەکوژرێت گورزێکی دیکەیە بەر تێگەیشتنمان لە جیهان دەکەوێت."
بە گوێرەی ئەو راپۆرتەی لیژنەی پاراستنی رۆژنامەڤانان بڵاویکردووەتەوە، پار دوو رۆژنامەڤان لە هەریەک لە وڵاتانی ئۆکراینا و مەکسیک کوژراون، لەکاتێکدا ساڵی پێشتر ژمارەکە 13 رۆژنامەڤان بوون.
لەو راپۆرتەی لیژنەی رۆژنامەڤاناندا ئەوەش هاتووە کە "حکومەتەکان سیخوڕی بەسەر رۆژنامەڤانان و بەرگریکارانی مافی مرۆڤدا دەکەن." هەروەها، "بەهۆی تووندوتیژیشەوە بەشیک لە رۆژنامەڤانان ناچار بوون وڵاتەکانیان و ئیشەکانیان جێبهێڵن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ