رووداو دیجیتاڵ
دۆناڵد ترەمپ لەدوایین وێستگەی یەکەم سەردانی فەرمی، گەیشتە ئەبوزەبی پایتەختی ئیمارات و سەردانی مزگەوتی گەورەی شێخ زایدی کرد.
دوانیوەڕۆی رۆژی پێنجشەممە 15-05-2025، فڕۆکەی سەرۆکایەتیی ئەمریکا گەیشتە ئیمارات و لە ئەبوزەبی نیشتەوە. دۆناڵد ترەمپ پێشوازییەکی گەرم و شاهانەی لەلایەن شێخ محەممەد بن زاید ئال نەهیان، هاوتا ئیماراتییەکەی لێکرا.
ترەمپ سەردانی مزگەوتی گەورەی شێخ زایدی کرد. ئەو مزگەوتە یەکێکە لە شوێنە گەشتیارییەکانی ئیمارات و ساڵانە گەشتیارێکی زۆر سەردانی دەکەن. شێخ خالید بن محەممەد، شازادەی جێنشینی ئەبوزەبی لەگەڵ ترەمپ چوونە مزگەوتەکە و ترەمپ بەبێ پێڵاو چووە ژوورەوە.
ئیمارات لە دوای سعودیە و قەتەر، سێیەم وێستگەی ترەمپە. ئەمە یەکەم سەردانی فەرمییەتی بۆ دەرەوەی ئەمریکا و ئامانجی سەرەکی واژۆکردنی دەیان رێککەوتن و بردنەوەی سەدان ملیار دۆلارە بۆ وڵاتەکەی.
پێش گەیشتنی ترەمپ؛ سارا ئەمیری، وەزیری پەروەردەی ئیمارات گوتی: "ئەمە پەیوەندییەکی سوودبەخشە بۆ هەردوو وڵاتەکە، ئەمە پەیوەندییەکە کە رەگ و ریشەیەکی بەهێز دروستدەکات. ئێمەش لە ئیمارات چاومان لەوەیە. پەیوەندیی نێوان واشنتن و وڵاتانی کەنداو زیاترە لە مامەڵە و حەواڵە."
بەگوتەی خانمە وەزیرەکە، ئیمارات دەیەوێت ئابوورییەکی هەمەچەشنی هەبێت، بەتایبەتی لە هەردوو بواری ژیریی دەستکرد و تەکنەلۆژیا.
ترەمپ لەگەڵ چوونە ژوورەوە بۆ نێو مزگەوتی شێخ زاید و گەیشتنە حەرەمی (نوور) گوتی: "ئەمە زۆر جوانە، زۆر شانازی بە دۆستەکانمەوە دەکەم، ئەمە کولتوورێکی دانسقەیە."
ئیمارات ئەمڕۆ بۆ سەردانەکەی ترەمپ مزگەوتەکەیان بەڕووی گەشتیاراندا داخست، لەوبارەوە ترەمپ گوتی: "ئەمە یەکەم جارە دایدەخەن، ئەمە شەرەفێکی گەورەیە بۆ ئەمریکا، شتێکە گەورەترە لە شەرەف؛ ئەمە رێزێکی زۆر مەزنە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ