رووداو دیجیتاڵ
نێردەی تایبەتی نەتەوە یەکگرتووەکان بۆ کاروباری سووریا لە دیمەشقەوە گوتی، هیوادارن سزاکانی سەر سووریا زوو هەڵبگیرێن و دووبارە ئاوەدانیی وڵاتەکە ببینن.
رۆژی یەکشەممە 15-12-2024، گیێر پێدرسن، نێردەی تایبەتی نەتەوە یەکگرتووەکان بۆ کاروباری سووریا گەیشتە دیمەشق. لە بەردەم مایکی چەند کەناڵێک کە مایکی رووداویشی لێبوو گوتی: "پرسیارە سەرەکییەکە لەبارەی بووژانەوەی ئابووریی سووریایە. پێویستە بە زوو چارەسەر بکرێت. هیوادارین سزاکانی سەر سووریا زوو هەڵبگیرێن بۆ ئەوەی دووبارە ئاوەدانیی سووریا ببینین."
رۆژی 08-12-2024 چەکدارانی دەستەی تەحریری شام (هەتەشە) و گرووپە هاوپەیمانەکانی کەوتنی بەشار ئەسەد، سەرۆکی پێشووی سووریایان راگەیاند و دەستیان بەسەر دیمەشقدا گرت.
کەوتنی دیمەشق دوای 24 ساڵ سەرۆکایەتیی بەشار ئەسەد، 13 ساڵ جەنگی ناوخۆ و 50 ساڵ حوکمی بنەماڵەی ئەسەد هات.
پێدرسن گوتی: "پێویستە پرۆسەی سیاسیی سووریا دەستپێبکات و گشتگیر بێت. پێویستە ئەم پرۆسەیە، هەروەک ئاشکرایە لەلایەن سووریاییەکانەوە بکرێت. بۆیە ئەمە لەسەر شانی سووریاییەکانە و پێویستە یارمەتییان بدرێت."
نێردەی تایبەتی نەتەوە یەکگرتووەکان داوایکرد، دامەزراوە حکومییەکان بەگەڕبخرێن، خزمەتگوزارییەکان دەستپێبکەنەوە و یارمەتیی زیاتری مرۆیی بگاتە سووریا. ئەو هەروەها گوتی: "پێویستە دادپەروەری و لێپرسینەوە لە تاوان ببینین، پێویستە لەوە دڵنیابینەوە کە ئەوانە بە نێو سیستمێکی دادیی متمانەپێکراودا تێپەڕ دەبن و هیچ تۆڵەسەندنەوەیەک نابینین."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ