رووداو دیجیتاڵ
لە ویلایەتی مشیگن لە ئەمریکا کەسێک دەچێتە نێو مەلەوانگەیەک و بە تەقەی هەڕەمەکی 9 بۆ 10 کەس بریندار دەکات؛ هێشتا پۆلیس تەقەکەرەکەی دەستگیر نەکردووە.
رۆژی یەکشەممە 16-06-2024 لە مەلەوانگەیەکی ویلایەتی مشیگن لە ئەمریکا، هەروەک پۆلیسی شاری ئۆوکلاند لەو ویلایەتە باسی دەکات، کەسێک بە تەقەی هەڕەمەکی 9 بۆ 10 کەسی بریندار کرد، یەکێک لە بریندارەکان منداڵە.
مایکڵ بۆوچارد، بەڕێوەبەری پۆلیسی ئۆوکلاند گوتی، "ئەو کەسە لە گەڕەکی رۆچستەر هیڵز لە ئۆتۆمبێلەکەی دابەزیوە و بەرەو مەلەوانگەیەک کە لەنێو پارکێکە چووە. بە هەڕەمەکی دەستی بە تەقەکردن کردووە، کاتێک گوللـەی پێنەماوە، دووبارە چەکەکەی پڕ گوللـە کردووە و دیسانەوە دەستی بە تەقەکردن کردووە و دواتر ئەو شوێنەی جێهێشتووە."
بۆوچارد دەڵێت، لە لێكۆڵینەوە سەرەتاییەکان دەرکەوتووە ژمارەی بریندارەکان 9 بۆ 10 کەس دەبن و لە تەمەنی جیاوازدان، یەکێکیان تەمەنی هەشت ساڵە. پۆلیس دەشڵێت، "دەستمان بەسەر دەمانچەیەکی جۆری گڵۆک گرتووە."
هێشتا هێرشکارەکە دەستگیر نەکراوە و پۆلیس دەڵێت، تیمی سوات و چەند ئۆتۆمبێلێکی گوللـەنەبڕ لە ناوچەکە بڵاوەیانپێکراوە و "بڕوامان وایە گومانلێکراوەکە هەر لەو ناوچەیە بێت."
گرێچن ویتمەر، حاکمی مشیگن لە ئێکس نووسی، "چاودێریی دۆخەکە دەکەین و لەگەڵ بەرپرسانی ناوچەکە لە پەیوەندیداین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ