رووداو دیجیتاڵ
پارێزگاری مۆسکۆ رایدەگەیێنێت، هەزاران دانیشتووی شاری مۆسکۆ لە بەرەکانی پێشەوەی شەڕ لە ئۆکراینا شەڕ دەکەن و دەشڵێت: "لانیکەم 5 هەزاریان سەربازی پیشەگەرن."
سێرگی سۆبیان، پارێزگاری مۆسکۆ رۆژی چوارشەممە، 16ـی ئابی 2023 قسەی بۆ میدیای وڵاتەکەی کرد، ئەو بەشداریی دانیشتووانی مۆسکۆی بە "بەشێکی گرنگ" لە شەڕی ئۆکراینا ناوبرد و ئاماژەی بەوەش کرد کە لەو سەربازانە "لانیکەم 5 هەزاریان سەربازی پیشەگەرن."
لە ئەیلوولی ساڵی رابردوو، ڤلایدیمێر پووتین، سەرۆکی رووسیا داوای کرد، 300 هەزار سەرباز لە سوپای وڵاتەکەی دابمەزرێندرێن و لە ئۆکراینا شەڕ بکەن.
رۆژی 3-8-2023، دیمیتری مێدڤیدیڤ، جێگری سەرۆکی ئەنجوومەنی ئاسایشی رووسیا رایگەیاند، لە سەرەتای ئەمساڵەوە زیاتر 230 هەزار هاووڵاتی رووسی ناوی خۆیان بۆ سەربازی لە سوپا دەربڕیوە.
سوپای رووسیا نزیکەی 1 ملیۆن و 15 هەزار سەربازی هەیە و وەزارەتی بەرگریی رووسیاش ئاماژە بەوە دەکات، دەیانەوێت ژمارەی سەربازەکانیان بگەیێننە ملیۆنێک و 500 هەزار سەرباز.
شەڕی نێوان ئۆکرانیا و رووسیا لە مانگی شوباتی 2022 دەستیپێکرد و بەگوێرەی رێکخراوی نەتەوە یەکگرتووەکان، لە دەستپێکی شەڕەکەوە تاوەکو 18ـی حوزەیرانی ئەمساڵ، نۆ هەزار و 83 هاووڵاتیی سڤیل کوژراون و 15 هەزار و 779 هاووڵاتیی دیکەش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ